Первая духовная грамота Дмитрия Ивановича

ДУХОВНАЯ ГРАМОТА (ПЕРВАЯ) ВЕЛИКОГО КНЯЗЯ
ДМИТРИЯ ИВАНОВИЧА
Около 1375 г.
Значительная часть грамоты утрачена; сохранился конец.
…тo… мъ дет… скую свободу, Руза, У… дъ, Вышегород, Истерва, Дмитрьева свобода… ми селы, и с бортники, и с оброчники, и с мыты. А что буде прикупил сел, или примыслил, или починков, или которая будуть села отца моего великом княженье купля, или моя села купленая, или брата моего села, княжи Ивановы, те села и починки сыну моему, князю Василью, и моей княгини, и моим детем.
А чим мене благословил отець мой, князь великий, которым золотом, суды или доспех, или что яз примыслил, тo золото, и шапку золотую, и чепь, и сабли золотые, и порты саженые, и суды золотые, и серебреные суды, и кони, и жеребьци, и стада своя, дал есмь своему сыну, князю Василью, и своей княгини, и своим детем.
А что отець мой, князь великий, сдал село Павловское к святому Олександру, а к святеи Богородици на Круцицю четвертую часть ис тамги ис коломеньское, а костки московьскые к святеи Богородици на Москве и к святому Михаило, а того не подвигнуть.
А что моих казначеев, или посельских, и тивунов, и деяков, хто что от мене ведали, те все сыну моему, князю Василью, ни моей княгини, ни моим детем не надобны. А что моих людий купленых, а тым дал есмь свободу, а сын мой, князь Василии, и моя княгини, ни мои дети не приимають их.
А сю грамоту писал есмь собе душевную и явил есмь отцю своему Олексею, митрополиту всея Руси. И отець мой Олексеи, митрополит всея Руси, и печять свою привесил к сей грамоте.
А послуси на сю грамоту: Тимофей околничий.., Иван Родивонович, Иван Федорович, Федор Ондреевич.
А грамоту писал дьяк Нестер.
А хтo иметь сю грамоту чим рушати,.. души.
На лицевой стороне грамоты привешены две серебряные позолоченые печати: великого князя Дмитрия Ивановича и митрополита Алексея.
Основание для датировки: грамота написана до смерти в 1378 г. митрополита Алексея, вернее всего в связи с походом Дмитрия Ивановича на Тверь в 1375 г. (ПСРЛ, т. VIII, стр. 23; т. XI, стр. 23; т. XVIII, стр. 116).
Выверено по изданию: Духовные и договорные грамоты великих и удельных князей XIV-XVI вв. Подготовлено к печати Л.В. Черепниным. – М.-Л.: Издательство Академии наук СССР, 1950.