Новгородская судная грамота

Новгородская Судная Грамота (1471 г.)
Доложа господы Великих Князей, Великого Князя Ивана Васильевича всея Руси, и сына его, Великого Князя Ивана Ивановича всея Руси, и по благословенью нареченного на архиепископство Великого Новагорода и Пъскова священноинока Феофила, се покончаша посадникы Ноугородцкие, и тысяцкие Ноугородцкие, и бояря, и житьи люди , и купци, и черные люди, вся пять концов , весь Государь Великии Новгород на вече на Ярославле Дворе:
1. Нареченному на архиепископство Великого Новагорода и Пскова священному иноку Феофилу судити суд свой, суд святительски по Святых Отец правилу, по Манакануну; а судити ему всех ровно, как боярина, так и житьего, так и молодчего человека .
2. А посаднику судити суд свой с наместники Великого Князи по старине; а без наместников Великого Князя посаднику суда не кончати .
3. А наместником Великого Князя и тиуном пересуд свой ведати по старине .
4. А тысецкому судить свой суд . А судить им право, по крестному целованью.
5. А сажати в суду по два человека . А кто кого в суду посадит, ино тот с тем и ведается. А посадника и тысецкого и владычня наместника и их судей с суда не сбивати.
6. А истцю на истца наводки не наводить , ни на посадника, ни на тысесского, ни на владычня наместника, ни на иных судей, ни на докладшиков. А кто наведет наводку на посадника, или на тысетцкого, или на владычня наместника, или на иных судей, или на докладшиков, или истец на истца у суда, или у доклада, или у поля , ино взять Великим Князем и Великому Ноугороду на виноватом на боярине 50 рублев, а на житьем дватцять рублев, а на молодшем десять руб. за наводку; а истцю убытки подоймет.
7. А кому будет о земле дело, о селе, или о дву, или болши, или менши: ино ему до суда на землю не наезщать, ни людей своих не насылать, а о земле позвати к суду. А утяжет в земле, нно взяти ему грамота у судьи в земле и в убытке на истце ; а от земли судье кун не взять .
8. А от судного рубля взять владыке, и его наместнику, и ключнику от печати гривна, а от безсуднаго рубля от грамоты взять владыке и его наместнику и ключнику три денги. А досаднику и тысесскому, и их судьям, и иным судьям имати от суднаго рубля по семи денег, а от безсуднаго рубля по три денги .
9. А орудье судить посаднику, и тысецкому и владычню посаднику, и их судьям, и иным судьям месяц; а дале того им орудья не волочить .
10. А кто на ком поищет наезда, или грабежа в земном деле: ино судити наперед наезд и грабеж; а о земли после суд. А кого утяжут в наезде и в грабеже, ино взять Великим Князем и Великому Ноугороду на виноватом: на боярине пятдесят рублев, а на житьем двадцать рублев, а на молодчем десять рублев; а истцю убытки подоймет; а о земле суд ; а не будет суда в Новегороде, а о наезде и грабеже суд .
11. А кои истец похочет искать наезда или грабежа и земли вдруг; ино другому истцю ему отвечать; а утяжет в земле и в наезде и в грабежи, и судье дать на него грамота в земле и в наезде и в грабежи.
12. А кто кого утяжет в земля и судную грамоту возмет, иню ему ехать на свою землю по судной грамоте, да и володеть ему тою землею; а в том пени нет .
13. А в котором деле позовет истец истца , а поищет своего дела, а будет тому истцю до своего истца дело: ино ему позвать своего истца, а поискать ему однного ж дела; а иных позвов на него не класти в ином деле, ни ноугородцев не научивати без хитрости по крестному целованью, доколе те суды кончают .
14. А кто на ком какова дела поищет, а креста не целовал на сей грамоте: ино крест поцеловав одинова, да искать; а кому будет овечивать, а ареста не целовав на сей грамоте, ино ему крест поцеловав да отвечать; а не поцеловав креста, тым его и обвинить .
15. А от коего истца ответчик станет на суд, а истец тот будет креста не целовав на сей грамоте; ино тому истцю крест целовать одинова, а ответчику в его место отвечивать; а не поцелует креста, ино тем его и обвинить.
16. А кому будет какое двло до старейшей жены, или до житьей, кои вдовы, а у коей есть сын, ино сыну ее целоват крест на сей грамоте за собя и за матерь однова; а не поцелует креста сын за матерь, ино целовать крест матери однова у собя в дому перед истцом и перед приставы Ноугородскими .
17. А целовать боярину и житьему, и купцю, как за свою землю, так и за женню.
18. А позовут боярина и житьего и купца в его земле, или в женне, ино ему отвечать, или ответчика послать в свое место и в женне, по тому крестному целованью.
19. А ответчику с послухом на учане крест целовать .
20. А при которых докладчикех суд раскажет, ино тем докладчиком тот суд кончать .
21. А судьям как росказщики укажут, ино коему ни есть судье велети своему дьяку тое дело написать; а росказщиком к тем списком свои печати приложить .
22. А послуху на послуха не быть . А Пъсковитину не послуховать, ни одерноватому холопу . А холоп на холопа послух.
23. А кто с кем пошлется на послуха, ино взять заклад шестнику на сто верст по старине, а подвойским и софьяном, и биричем, и изветником на сто верст четыре гривны. А вой истец скажет послуха дале ста верст, а похочет и другой истец слаться на того послуха: ино слаться на него; а не всхочет другой истець слаться дале ста верст, ино поставить ему своего послуха у суда; а срок ему взять на послуха на сто верст по три недели; а заклад дать виноватому истцю на сто верст шестнику .
24. А кто с кем ростяжется о земле, а почнет просить сроку на управы, или на шабъры , ино ему дать один срок на сто верст три недели; а дале и ближе, и то по числу; а ему сказать шабра своего на имя, за кем управы лежать по крестному целованью; да и по руце ему ударити с истцом своим; а посаднику приложить к срочной грамоте своя печать, а иному сроку не быть; а от сроку взять гривна. Также и иным судьям давать срок по томуж. А кой истець не возметь срочной за печатью, ино тем его и обинить тому судье, перед коим суд был; а сроку не ждать. А о иных делах срок по старине.
25. А в тиуне одрине быти по приставу с сторону людем добрым, да судити им правду, крест поцеловав на сей на крестной грамоте .
26. А докладу быти во владычне комнате, а у докладу быть из Конца по боярину да по житьему, да кои люди в суде сидели, да и приставом; а иному никомуже у доклада не быть . А докладчиком садиться на неделю по трижды: в понедельник, в середу и в пяток. А кой докладчик не сядет на тот день, ино взять на боярине два рубли, а на житьем рубль. А докладшиком от доклада посула не взять, а у доклада не дружить никоею хитростию по крестному целованью. А кому сести на докладе, ино ему крест целоват на сей на крестной грамоте однова.
27. А посаднику и тысяцкому, и владычню наместнику, и их судьям, и иным судьям всим крест целовать, да судить им в правду.
28. А земное орудье судити два месяца; а болши дву месяць не волочити . А как межник приедет с межи, ино той суд кончати посаднику в другие два месяца томуж посаднику, а дале не волочить. А кой посадник межника дав, а поедет прочь из города не кончав того суда, ино Великим Князем и Великому Новугороду на том посаднике пятдесят рублев, а истцю убытки подоймет; или тысетцкой поедет прочь из города не кончав суда, или владычень наместник, ино взять Великим Князем и Великому Новугороду пятдесят рублев; а истцю убытки подоймет .
29. А не кончает судья земного орудья в два месяца, ино истцю взять на него приставы у Великого Новагорода, ино ему тот суд кончати перед тыми приставы. А не укажут суд и докладшики в тую два месяця, ино итти судье с истцом в Великому Новугороду, да взяти приставы на докладшиков: а докладшиком указати суд и тое дело перед тыми приставы; а судье кончати истцю тое дело перед темиж приставы .
30. А буде ли истци у коего судьи возмут срок и срочныя за печатми, а той судья переменится, а кто будет судья на его место, ино тым истцом стать перед тыми судьями, да и срочныя свои положити на той срок: а тому судье судити той суд, да кончати .
31. А один истець станет на тот срок перед судьею, да и срочную свою грамоту положит, а другой не станет, ино тому судье, дати на него грамота ; да и срочная грамота к той же ему грамоте припечатать, а отсылки ему не отсылати.
32. А во чье будет место ответчик срок взял, а до тово сроку сведется ответчику смерть: ино на той срок стать самому истцю, или иного ответчика поставить во свое место; а не станет сам, или иного ответчика не поставит, ино тым его и обинить .
33. А кто кого утяжет в татбе с поличным, или в разбой, или в грабежи, или в поголовщине, или в холопстве, или о полевой грамоте : ино взять судьям от судной грамоты четыре гривны, а от безсудной две гривны.
35. А кто на кого возмет грамоту судную, а будет ему дело до судьи, или до истца; ино ему переговариваться с ними месяць; а не почяет переговариватьця в тот месяць, ино взять на него приставы с веча, да имать его в городе и в селе с тыми приставы; а почнет хорониться от приставов, ино его казнить всим Великим Новымгородом.
35. А кого опослушествует послух, ино с ним уведается в две недели; а в те две недели не дастъся послух позвати, ино позвати истца; а послух истець хоронится, ино то послушство не в послушство; а другого истця тым и оправить. А кто не почнет позывать в те две недели послуха, или истца, ино дать на него грамота судная по тому послушству .
36. А кому будет дело до владычня человека, или до боярьского, или до житейского, или до купетцкого, или до манастырьского, или до кончанского, или до улитцкого, в волости о татьбе, и о розбое, и о грабежи и о пожозе, и о годовщине, и о холопстве, а кто будет крест целовал на сей грамоте, ино ему речи правое слово, а рука дать по крестному целованью, что той человек тать и разбойник, или грабезщик, или пожещик, или душегубец, или холоп. Ино в коей волости будет от владыки волостель, или поселник, ино им поставить того человека у суда; а боярину и житьему, и купцу, и манастырьскому заказщику, и поселнику, и кончанскому, и улитцьскому также своих людей ставить у суда; а срок взять на сто верст три недели, а ближе и дале по числу; а до суда над ним силы не деять; а кто силу доспеет, ино тым его и обинить .
37. А кого утяжут , а дался в грамоту, ино ему у того осподаря в волости не жить; а имет жить у того осподаря в волости, а доличат, ино той государь т убытки подоймет. А бежит в иную во чью волость, ино тому государю выдать его тому истцю; а в иную ему волость не отсылати по крестному целованью, ни его людем; а о иных делех, ино знать истцю истца. А не скажет кто того человека у собя по крестному целованью, да и руку даст, что там ему не быть, а уличат, что у него в волости, ино той государь ему истцю убытки подоймет. А к коему господарю в иную волость прибежит, ино тому господарю поставить его у суда по крестному целованью: а кто не поставит, ино взять на том заклад по Ноугородской грамоте.
38. А кто на кого взговорит на владычня человека, или на боярского или на житьего, или на купетцкого, или на монастырьского, или на кончанского, или на улитцкого, а будет сам креста не целовал на сей грамоте, и он сам уведается с своим истцом по своей исправе опричь осподаря .
39. А кто обечается к суду к коему дни, ино опосле обета отсылки к нему не слать; а не сядет судья того дни, ино коли судья сядет, и тогда к нему отсылка; а не видит отсылки, и почнет хорониться ино слать к нему отсылка в двор трижды, да и биричем кликать; а не станет к суду, ино дать на него грамота обетная: а обету болши трех денег не быти .
40. А приму т позовника в селе, а почнут над ним силу деять, ино дать в позовниково место грамота безсудная, племеннику его или другу .
41. А кто кого позовет в селе позовкою, или дворянином , ино дать срок на сто верст две недели, а дале и ближе, — а то по числу.
41. От конца или от улици, и ото ста, и от ряду итти ятцом двема человеком; а иным на пособье не итти к суду, ни к розсказу. А будет наводка — от конца, или от улици, или ото ста, или от ряду: ино Великим Князем и Великому Ноугороду на тых дву человекех по Ноугородской грам…

Did you enjoy this post? Why not leave a comment below and continue the conversation, or subscribe to my feed and get articles like this delivered automatically to your feed reader.

Comments

Еще нет комментариев.

Извините, комментирование на данный момент закрыто.