Договор русских с греками 911

Договор Русских с Греками при Кн. Олеге, 911 г.
(по ипатскому списку).
В лето 6420. Посла Олег мужи свои построити мира и полежити ряды межи Грекы и Русью; и посла глаголя равно другаго свещания, бывшаго при тех же царих Лва и Александра .
1. Мы от рода рускаго, Карлы, Инегелд, Фарлоф, Веремуд, Рулав, Гуды, Руалд, Карн, Фрелав, Рюар, Актеву, Труан, Лидульфост, Стемир, иже послани от Олга, великаго князя Рускаго, и от всех, иже суть под рукою его, светлых бояр, к вам, Львеви и Александру и Костянтину, великым о Бозе самодержьцем, царемь Грецкым , на удержание и на извещение от многых лет межю Христианы и Русью бывшюю любовь , похотеньем наших князь и по повелению, и от всех, иже суть под рукою его сущих Руси. Наша светлость боле инех хотящих же о Бозе удержати и известити такую любовь, бывшюю межю Христианы и Русью, многажды право судихом, но точью простословесен, и писанием и клятвою твердою, кленшеся оружьемь своим, такую любовь известити и утвердити по вере и по закону нашему.
2. Суть, яко понеже мы ся имали о Божии вере и любви, главы таковые: — По первому слову да умиримся с вами Грекы, да любим друг друга от всея душа и изволенья, и не вдадим, елико наше изволение быти от сущих под рукою наших князь светлых, никакому же съблазну или вине; но потщимся елико по силе, на схранение прочих и всегда лет с вами Грекы исповеданием и написанием с клятвою извещаемую любовь непревратну и непостыжну. Такоже и вы, Греци, да храните таку же любовь к князем же светлым нашим рускым и к всем, иже суть под рукою светлаго князя нашего, несъблазнену и непреложну всегда и в вся лета.
3. А о головах, иже ся ключит праказа, урядимся сице: да елико яве будеть показании явлеными, да имеють верное о тацех явлении; а емуже начнуть не яти веры, да не кленется часть та, иже ищеть неятью веры, да егда кленется по вере своей, будеть казнь, якоже явится съгрешение о сем .
4. Аще кто убиеть Крестьяна Русии, или Христьянин Русина, да умреть, идеже аще створить убийство. Аще ли убежить створивый убийство, аще есть имовит, да часть его, сиречь иже его будет по закону, да возметь ближний убьенаго, а иже на убившаго да имееть толцемь же прибудеть по закону; аще ли есть неимовит створивый убойство и убежав, да держится тяжи, допдеже обрящется, яко да умреть .
5. Аще ли ударить мечемь или бьеть кацем любо ссудом, за то ударение или убьение да вдасть литр 5 сребра по закону Рускому; аще ли будеть неимовит тако створивый, да вдаст елико можеть и да соиметь с себе и ты самыя порты своя, в них же ходять, а опроче да роте ходить своею верою, яко никакоже иному помощи ему, да пребывает тяжа оттоле невзискаема о семь .
6. Аще уврадеть Русин что любо у Крестьянина, и пакы Христьянин у Русина, и ять будеть в том часе тать, егда татьбу створить, от погубившаго что любо, аще приготовится татьбу творяй и убиен будеть: да не взыщется смерть его ни от христьян, ни от Руси, но паче убо да възметь свое, иже буреть погубил. И аще въдасть руце украдый да ят будеть тем же, у него же будеть украдено, и связан будеть, и отдасть то, еже сме створить, и створить трижды о семь .
7. Аще ли кто, или Русин Хрестьяну, или Хрестьян Русину, мучения образом искус творити и насилье яве, или възмет что любо дружинне, да вспятить троич.
8. Аще вывержена лодья будеть ветром великом на землю чюжю, в обрящються тамо иже от нас Руси, да аще кто идеть снабдети лодью с рухлом своим, и отсылати пакы на землю Крестьяньску, да проводим ю сквозе всяко страшно место, дондеже придет в безстрашно место; аще и таковая лодья, и от буря или боронения земнаго боронима, не можеть възборонитися в своя си места, спотружаемъся гребцем тоя лодья мы Русь, и допровадим с куплею их поздорову, ти аще ключится близ земли Грецькы; аще ли ключится такоже проказа лодьи Рустей, да проводим ю в Рускую земьлю, и да продають рухло тоя лодья, и аще что можеть продати от лодья, воволомим им мы Русь, да егда ходим в Грекы, или с куплею, или в солбу, к цареви вашему, да пустим я с честью проданное рухло лодья их; аще ли ключится кому от тоя лодья в ней убьену быти, или бьену быти от нас Руси, или взяти что любо, да повиньни будуть те створшии преждереченою епитемьею .
9. От тех аще полоняник обою страну держим есть, или от Руси или от Гpeк, продан в ину страну, оже обрящеться или Русин или Гречин, да не купять и взвратять и скупленое лице в свою страну, и възмуть цену его купящии, или мниться в куплю на дань челядиная цена; такоже аще от рати ят будет, да от тех грек такоже да възвратится в свою страну, и отдана будеть цена его, якоже речено есть, якоже есть купля.
10. Егдаже требуеть на войну ити, егда же потребу творите, и си хотять почестити царя вашего, да аще в кое время елико их придеть и хотять остати у царя вашего, своею волею да будуть.
11. О Руси о полоненьи: многажды от коея убо страны пришедшим в Русь и продаемым в Крестьяны, и еще же и от христиан полонных мьногажды от коея любо страны приходящим в Русь: се продаеми бывають по 20 золота и да придуть в Грекы .
12. О том аще украден будеть челядин Рускый, или въскочить, или по нужи продан будеть, и жаловати начнуть Русь, да покажеться таковое от челядина, да имуть и в Русь; но и гостье погубиша челядин, и жалують, да ищють и, обретаемое да имуть е; аще ли кто искушения сего не дасть створити, местник да погубить правду свою .
13. О работающих в Грецех Руси у хрестьяньского царя: аще кто умреть, не урядив своего именья, ци и своих не имать, да възвратить именье к малым ближикам в Русь; аще ли створить обряжение, таковый възметь уряженое его, кому будеть писал наследити именье, да наследить е от взимающих куплю Руси от различных ходящих в Грекы и удолжающих .
24. Аще злодей възвратится в Русь, да жалують Русь христьяньскому царству, и ять будеть таковый и възвращен будеть не хотяй в Русь .
15. Си же вся да творять Русь Греком, идеже аще ключится таково. На утвержение же и неподвижение быти межи вами Хрестьяны и Русью, бывший мир сътворихом Ивановом написанием на двою харотью, царя вашего и своею рукою, предлежащим честным крестом и святою единосущною Троицею, единаго истиньнаго Бога нашего, извести и дасть нашим словом ; мы же кляхомся к царю вашему, иже от Бога суще яко Божие здание по закону, и по покону языка нашего, не переступати ни нам ни иному от страны вашея, от уставленых глав мира и любве. И таково написание дахом царства вашего на утвержение обоему пребывати, таковому свещанию, на утвержение и извещение межи вами бывающаго мира, месяца себтября в 2, а в неделю 15, в лето создания миру 6420.

Did you enjoy this post? Why not leave a comment below and continue the conversation, or subscribe to my feed and get articles like this delivered automatically to your feed reader.

Comments

Еще нет комментариев.

Извините, комментирование на данный момент закрыто.