Договор Новгорода с польским королем Казимиром

Договор Новгорода с Польским королем Казимиром IV. 1470 или 1471-го года .
Се яз честны король полский и князь велики литовьский докончал есми мир с нареченным на владычьство с Феофилом, и с посадники новгородцкими, и с тысяцкими, и с бояры, и с житьими, и с купци, и со всем Великим Новымгородом. А приехаша ко мне послове от нареченнаго на владычьство Феофила, и от посадника степенного, и от тысяцкого степенного Василья Максимовича, и от всего великаго Новагорода мужей волных, посадник новогородский Офонас Остафьевичь, посадник Дмитрей Исаковичь и Иван Кузмин сын посадничь, а от житьих Панфилей Селифонтовичь, Кирило Ивановичь, Яким Яковличь, Яков Зиновьевичь, Степан Григорьевичь. Докончал есми с ними мир и со всем Великим Новымгородом, с мужи волными.
1. А держати ти честны король, Велики Новгород на сей на крестной грамоте. А держати тобе, честному королю, своего наместника на Городище от нашей веры от греческой, от православнаго хрестьянства; а наместнику твоему без посадника Новогородцкаго суда не судити , а от места кун не имати ; а Великому Новугороду у твоего наместника суда не отъимати, опричь ратной вести и городоставлениа ; а судити твоему наместнику по Новогородцкой старине .
2. А дворецкому твоему жити на Городище на дворце, по Новогороцкой пошлине; а дворецкому твоему пошлины продавати с посадником Новогородцким по старине, с Петрова дни .
3. А тиуну твоему судити в одрине с Новогородцкими приставы .
4. А наместнику твоему и дворецкому и тиуну быти на Городище в пятидесят человек.
5. А наместнику твоему судити с посадником во владычне дворе, на пошлом месте, как боярина, так и житьего, так и молодщего, так и селянина; а судити ему в правду, по крестному целованью, всех равно; а пересуд ему имати, по Новогородцкой грамоте по крестной, противу посадника, а опричь пересуда посула ему не взяти.
6. А во владычен суд и в тысяцкого а в то ся тебе не вступати, ни в манастырские суды, по старине.
7. А пойдет князь велики московский на Велики Новгород, или его сын или его брат, или которую землю подъиметь на Велики Новгород, ино тебе нашему господину честному королю всести на конь за Велики Новгород, и со всею своею радою литовскою, против великого князя, и боронити Велики Новгород; а коли, господине честны король, не умирив Великаго Новагорода с великим князем, а поедешь в Лятцкую землю или в Немецкую, а без тебе, господине, поидет князь велики, или его сын, иди его брат, или кою землю подоймет на Велики Новгород, ино твоей раде литовской всести на конь за Велики Новгород, по твоему крестному целованию, и боронити Новгород.
8. А что Ржова, и Великиа Луки и Холмовски погост, четыре перевары, а то земли Новгородцкия , а в то ся тебе, честному королю, не вступати, а знать тебе твоя черна куна, а те земли к Великому Новугороду. А Ржеве, и Лукам, и Холмовскому погосту, и иным землям Новгородцким и водам от Литовской земли рубежь по старине.
9. А сведется Новгородцу суд в Литве, ино его судити своим судом, а блюсти Новгородца как и своего брата Литвина, по крестному целованью; а сведется суд Литвину в Великом Новегороде, ино его судити своим судом Новгородцким, а блюсти его как и своего брата Новгородця, по крестному целованью, тако ж.
10. А сведется поле Новгородцу с Новгородцом, ино наместнику твоему взяти от поля гривна, а двема приставом две деньги, а учнут ходити за сречкою на поле , ино взяти твоим приставом две денги.
11. А в Русе ти имати за проезжей суд , через год, сорок рублев; а держати десять варниць в Русе; а в Водцкой земле имати за проезжей суд, через год, тридцять рублев; а в Ладоге ти пятнадцять рублев; а с Ижеры два рубля; а с Лопци рубль за проезжей суд, через год; а по иным волостем по Новогородцким имати тобе пошлины по старине; а Новугороду пошлин не таити по крестному целованью.
12. А вывода ти, честны король, из Новогородцкой отчины не чинити, а челяди не закупати, ни даром не принимать.
13. А подвод по Новогородцкой отчине не имати, ни твоим послом, ни твоему наместнику, пи иному никому ж в твоей державе.
14. А черна куна имати по старым грамотам по сей крестной грамоте: а на Молвотицях взяти ти два рубля, а тиуну рубль за петровщину; а на Кунске взяти ти рубль; а на Стержи тридцать куниць да шестьдесят бел; а с Моревы сорок куниць да восмьдесят бел, а петровщины рубль, а в осенине полрубля; а в Жавне двадцать куниць да восмьдесят бел, а петровщины рубль, а мед и пиво с перевары по силе; а на Лопастицях и на Буйцях у чернокунцев по две куници и две бели, а слугам бела; а на Луках наш тиун, а твой другой, а суд им наполы; а Торопецкому тиуну по Новгородцкой волости не судити; а в Лубокове и в Заклинье две куници и по две бели, а петровщины сорок бел; а во Ржеве по две куници и по две бели, а с перевары мед и пиво по силе; а в Новогородцких волостех, ни на Демоне, ни на Цсне, ни на Полонове, не надобе иное Литве ничтож, ни чорны куны не брати , а иных пошлин тобе, честны король, на Новогородцкия волости не вкладывать через сию крестную грамоту.
15. А сведется вира, убьют сотцкого в селе, ино тебе взяти полтина, а не сотцкого, ино четыре гривны, а нам вир не таити в Новегороде, а о убистве вир нет .
16. А что волости, честны король, Новгородцкия, ино тебе не держати своими мужи, а держать мужми Новогородцкими ; а что пошлина в Торжку и на Волоце тивун свой держать на своей части, а Новугороду на своей чясти посадника держати. А се волости Новогородцкия: Волок со всеми волостми, Торжек, Бежица, Городець, Палець, Шипино, Мелеця, Егна, Заволочье, Тир, Пермь, Печера, Югра, Вологда с волостми.
17. А пожни, честный король, твои и твоих мужь, а то твои, а что пожни новогородцкия, а то кь Новугороду, как пошло .
18. А дворяном с Городищя и изветником позывать по старине .
19. А на Новгородцкой земле тебе, честны король, сел не ставити, ни закупать, ни даром не принимать, ни твоей королевой, ни твоим детем, ни твоим князем ни твоим паном, ни твоим слугам .
20. А холоп, или роба или смерд , почнет на осподу вадити, а тому ти, честны король, веры не нять.
21. А купець пойдет во свое сто, а смерд потянет в свой потуг в Новугороду, как пошло.
22. А приставов тебе, честны король, не всылати во все волости новогородцкия .
23. А у нас тебе, честны король, веры гречьские православные нашей не отъимати; а где будет нам Великому Новугороду любо в своем православном хрестьянстве, ту мы владыку поставим по своей воли; а римских церквей тебе, честны король, в Великом Новегороде не ставити, ни по пригородам новогородцким, ни по всей земли новогородцкой.
24. А тиуну твоему в Торжку судити суд с новогородцким посадником, також и на Волоце , по новогородцкой пошлине, новогородцким судом, и виры и полевое по новогородцкому суду.
25. А что во Пскове суд и печять и земли Великого Новагорода, а то в Великому Новугороду по старине.
26. А умиришь, господине честны король, Велики Новъгород с великим князем, ино тебе взяти честному королю черны бор по новогородцким волостем по старине одинова, по стары м грамотам, а в иные годы черны бор не надобе .
27. А немецкаго двора тебе не затворяти, ни приставов своих не приставливати; а гостю твоему торговати с немци нашею братьею .
28. А послом и гостем на обе половины путь им чист, по Литовской земле и по Новогородцкой.
29. А держать тебе, честны король, Велики Новгород в воли мужей волных, по нашей старине и по сей крестной грамоте .
А на том всем, честны король, крест целуй ко всему Великому Новугороду за все свое княжество и за всю раду Литовскую в правду, безо всякаго извета. А новогородцкие послове целоваша крест новогородцкою душею к честному королю и за весь Велики Новгород, в правду, без всякого извета.

Did you enjoy this post? Why not leave a comment below and continue the conversation, or subscribe to my feed and get articles like this delivered automatically to your feed reader.

Comments

Еще нет комментариев.

Извините, комментирование на данный момент закрыто.