Губная московская запись

ГУБНАЯ (УСТАВНАЯ) МОСКОВСКАЯ ЗАПИСЬ (ПРЕЖДЕ 1486 ГОДА).
1. Запись, что тянет душегубьством к Москве. Серпухов со всеми волостми и со княженьскыми селы и с монастырскыми селы; а Хотунь по томужь с всеми волостми и селы, и Перемышль, и Растовец, и Городец, и Суходол, и Щитов, и Голичици по Нару, Звинигород, и Руза, со всеми ж волостьми и селы. А дмитровьскых волостей тянет, Въхна, Сельна, Гуслици, Загорие, Рогож; а в московьском уезде во всем по коломьньскый уезд и по дмитровьскый, княженьскых сел и… и великие кнегини села, и митрополичи, и манастырьскые вси душегубьством к наместнику же к Москве .
2. А на Москве на посаде лучится душегубьство за рекою за Москвою, ино к тому и Даниловьское; а будет душегубьство за Яузою, ино к нему Анъдрониев манастырь и Городищо; а лучится душегубьство на Великой улици у Николы у Мокрого, ино к тому от острого конца и до Варьской улици; а лучится душегубьство за Варьскою улици; а лучится душегубьство за Варьскою улицею, ино к тому и у Стретеньской улици и по Неглимну; а за Неглимною лучится душегубьство, ино к тому и Дорогомилово, все Занеглименье и Семьчиньское .
3. А учнет искать москвитин на семьчинине, на нагатинци, на островлянине и Колеменьского села, и на прудском и на сущевленине, и великие кнеини дворы у городе, и митрополити, и манастырьскые, что ни есть дворов на Москве, и на огородниках, и на садовниках великого князя и великие кнеини, и митрополичи, ити им искати перед большего наместника московьского, а судья за ним идеть своего прибытка смотрит . А поимают за поличным, ино суд; и за тем нет, ино судить и казнить большей наместник .
4. А посулят большему наместнику, а двема третником тоже , а тиуну великого князя что посулят . А у заповеди, то у торгу кличить , наместнику большему с двема третники по третем же, а тивуну великого князя нет ничего у заповеди. А у поля ему вяжщого треть, а пересуда треть же да что посулят. А поголовьщины наместником четыре рубли, а тивуну великого князя вяжщого треть, а пересуда треть же у наместников у третников; а пересуда идет с рубля по десяти денег, а менши рубля пересуда нет; а кто учнет безчестия искать, то со всякого пересуд.
5. И что городов великого князя и волостей и сел и великие кнеини, и удельных князей городов и волостей и сел, кого поимают за поличным на Москве, судит его наместник московьскый с двема третники, и казнит, а отсиклы ни судьи за ним нет .
6. Поимают опроче того в пеном деле, в каком ни есть, срок ему дать судью за собою поставить, занеже у докончаньи писано по крестному целованию: в московскые суды не вступатиь никоторому князю .
7. По старине бывало, что вси дворы и дворцовыи великие кнегини и удельных князей, всих суживал наместник большей, судии за ними не бывало; а учинила то княини великая София при Иоане при Дмитреевиче, кто судья за ними ставится .
8. А во Езерецкое село, тамо судья с Москвы не ездит, да ездит пристав, да возмет собе товарища, и дав на поруце да судит его на Москве большей наместник, а судья за ним придет, своего прибытка смотрит; також и по инем селом великие кнеини и уделных князей в Московском уезде .
9. А что деревни в Московьском в становом уделных князей, и волостели их судят, а доложит своего князя, ажь будет на Москве: а не будет на Москве его князь, и ему доложить великого князя или болшаго наместника, а по иным городом их не водить к докладу .
10. А поимают тферитина за поличным на Москве, и судят и казнят его на Москве, а отсылкы ни судьи за ним нет; а поимают в пеном деле, ино его дать на поруце, а искати на нем во Тфери .