Уставная грамота жителям Витебской земли, 1503 г.

УСТАВНАЯ КОРОЛЕВСКАЯ ГРАМОТА
ЖИТЕЛЯМ ВИТЕБСКОЙ ЗЕМЛИ 1503 Г. ИЮЛЯ 16
Сам Александр, Божьею милостью король Польский, великий князь Литовский, Русский, княжа Пруское, Жомонтский и иных, чиним знаменито сим нашим листом, кто на него посмотрит, альбо чтучи его въслышит нинешним и потом будущим, кому будет потреба того ведати. Били нам чолом вси князи и бояре и слуги витебские, и войт и мещане места Витебского, и вся земля Витебская , и поведили перед нами, штож пришодши злодеи с Великого Новгорода покрали в нихцерьковь Пречистой Богоматери, и в той церкви и привилей их украли, который же они от отца нашего короля его милости имели, и копию того привилея перед нами клали и били нам челом, абыхмо им наш лист привилей потомуж дали. Ино мы с ласки нашое, за их к нам верную службу, пожаловали есмо их тым, дали им наш лист , потомуж как отец наш король его милость им дал был: штож нам в домы церковныи, в дом Божий святой Богородицы, и в дом Божий Святого Духа, и теж в дом Божий Благовещенья Пречистое и в иные церкви не вступатися ; и в купленины, которыи будут куплены с нашим дозволеньем , и в безадщины и в отмерщины Витебские теж не маем вступатися , и жен их силою замуж не давать, а который Витеблянин, умирая, откажет остаток своего именья кому, и в то нам не вступатися . А в подводы коней у городских людей и у поселских путных не брать. А холопу и робе веры не няти, а о обаде исправа дати. А предков наших великих князей судов не посуживати: чинити нам с Витбляны по испросу, а без исправы Витблянина не казнить; а своих судов, судивши, не посуживати, а вина придет, ино нам их по вине казнити. А челом-битье нам у Витблян приймати, через поруку в железа их не сажаючи, а ни в которую муку. А отчин в них не отнимать, також и в села их купленыи и в поля не вступатися. А на заочное поведанье не верить; а кто иметь нам их обмовляти, того нам Витбляном объявить, а в заставу нигде Витблян не сажать. А на войну быть им с нами посполу готовым. А по волости по Витебской воеводе нашему не ездить, а поедет в ловы, ино его по станом не дарити. А станется у которого Витблянина татьба, а доищутся татьбы лицом: ино Витблянину вся татьба лицом вернут, а чего лицом не доищутся которое татьбы, ино истцу с татиного дому женою его и детьми заплатить его гибель, а в том тати мы вольны; а не будет у татя чем платить татьбы, ино его истцу выдать, и где его всхочет там его денет . А сябров городских в пригон наш не гнати, а ни в подводы, а ни в ловы. Також и в весы витебскии, а ни в локоть нам не вступатися; а воли который Витблянин у весех проступит, або у локти, ино Витбляном самим казнить виноватого, по своему праву, а нам в то не вступатися. А в которого Витблянина загудят воск в Ризе, або инде, а приедет до Витебска: ино Витбляном, самим казнить виноватого, а нам в то не вступатися. А где чья отчина, селца, реки, або озера, нам и в то не вступатися; а Витбляном наших рек або озер не таити, а кто потаит, ино нам тех карать. А Витбляны нам не даритися никому . Также есмо им и мыта отпустили по всей отчине нашей вечно. И еще пожаловали есмо их, придали им, на садибу и на выгон, Койтин бор, а Михайловский бор, а Заручевский бор. Теж, которые Витбляне межи собою побьются, а за децким поеднаются, ино нам куница шерстью зъмирьщины; а коли о чем посварятся и выдадут ся в колце оба, то вина на нас; а выдаст ся один, а другой не выдаст ся, за то их нам не казнить . А за закладную куницу на нас брать по десять грошей, а борцу по два гроши, також децкованье от рубля по четыре гроши, а на милю по грошу; а владычиному слуге и боярскому потомуж децкованье. И теж владыце на попех Витебских сборная куница шерстью . Також им нам давать воеводу по старому , по их воле, и который им будет нелюб воевода, а обмовят его перед нами: ино нам воеводу им иного дати, по их воле; а приехавши воеводе нашему к Витебску, первого дня целовать ему крест к Витбляном, на том, штож без права их не казнить по вадам ни в чем. Также Витбляном жити у Витебску добровольно, всякому, по старому, покуль кто всхочет; а которому Витблянину будет от нас насильно, а будет ему нелюбо: нам его силою не держать, ино ему путь чист, куда хочет, безо всякой зачепки; а пойти ему прочь в нашу отчину в Литву, не тайно, Святому Благовещенью – челом ударивши и нашему воеводе объявився и своей братьи мужем Витбляном, а во своем именье волен во всем: идя прочь продаст, або откажет, нам в то не вступатися. Також который ся от насилья жаловать будет нам Витблянин на Витблянина ж, приехав в Литву: и без истца нам на него децкого с Литвы не слать, давать ему наш лист к нашему воеводе, хотя бы о смертной вине, а ему судить по целованью, нашим судом, досмотревши права с князи и с бояры и с мещаны, а осудивши его казнить в Витебске, по их праву . Теж который будет князь, або боярин або слуга, або мещанин што выслужил на предках наших великих князей, того нам у Витблян не отнимати по грамотам тех князей; а местичов Витебских из города Витебска не вести вон. Также которые будут, Литвин, або Лях, крещены были в Витебске в Русскую веру, а кто из того роду и теперь живет, того нам не рушить, права их христианского ни в чем не ломить. А на то на все дали есмо им сесь наш лист твердо и вечно, и печать нашу казали есьмо привесить к сему нашему листу. Писан в Вильно, в лето 7011, месяца июля в 16-й день, индикта 6. При том были: бискуп Виленский, князь Войтех; а воевода Виленский, канцлер пан Николай Радивилович; а маршалок охмистр королевое, наместник Ковенский пан Войтех Янович, «Ивашко Сопежич, писарь».
____________________________
Витебская Грамота напечатана в Акт., относ. к ист. Запад. России, т. I, № 204.