Правая грамота, XV в.
Правая грамота
кн. Михаила Андреевича по делу Льва Ивановича с Кириловым монастырем, ХV в.
Си суд судил Князь Михайло Андреевич. Тягался Лев Иванович и за свою невестку Гаврилову жену Ивановича Авдотью, и за своего брата Дмитрия Ивановича с Игнатьем старцем Кирилова монастыря. Тако рек Лев: жалоба нам, господине, на Игумена на Трифона Кирилова монастыря и на его братью; отнимают, господине, у нас от суда, да от дани в нашей ощине в Кистеме деревню Михалевскую Гаркавого; а та, господние, деревня из старины тянет судом к нам; еще, господине, отец нас Иван судил ту деревню и дань на ней имал, а после, господине, отца нашего судили мы ту деревню со своею братьею, и дань на ней имали есмя. И Князь Михайло Андреевич въспросил Игнатья, старца Кирилова монастыря: отвечаешь ли ты за Игумена за Трофима и за всю свою братью? И Игнатей старец тако рек: яз, господине, отвечаю за Игумена за Трифона и за всю братью. И став Игнатей старец тако рек: ту, господине, деревню дал нам к монастырю Арсений чернец Микитин сын в дом Пречистой Богородицы, да подавал нам, господине, и грамоты тое деревни, что, господине, еще грамота купчая прабабы его Офимьина на ту деревню, да грамоты, господине, жалованье отца твоего князя Андрея Дмитриевича к его делу ко Андрею Кормилицыну, и к его отцу к Миките Андрееву, что их Белозерским наместником и Кистемьским бояром не судить ни в чем, ни всылати к ним в ту деревню ни по что; а се, господине, грамоты перед Богом, да перед тобою. И князь Михайло Андреевич возрел в грамоты отца своего Князя Андрея Дмитриевича; ажо в грамотах писано, что тое деревни Белозерским наместником и Кистемским бояром не судити ни в чем, ни дани с тое деревни не имати, ни всылати в ту деревню ни по что; и по тем грамотам отца своего князя Андрея Дмитриевича Князь Михайло Андреевич Игумена Трифона Кирилова монастыря и старца Игнатья и их братью оправил, Сава Иванович и его брата Дмитрия Ивановича и его невестку Гаврилову жену Ивановича Авдотью обвинил, и придал ту деревню к Кирилову монастырю и с судом и с данью; а сию грамоту правую велел подписать Князь Михаил Андреевич попу Иеву Печатнику.
Правая грамота напечатана в «Актах, относящихся до гражданской расправы древней России», изд. А.А. Федотовым-Чеховским, т. I. № 4.