Усобицы в Орде по Никоновской летописи
УСОБИЦЫ В ОРДЕ ПО НИКОНОВСКОЙ ЛЕТОПИСИ
В лето 6849 (1341–1342)<…> Тое же осени умре царь Азбяк Ординский, и седе по нем в Орде на царстве сын его старейший Тинбек, и другой бысть сын его Чанибек, и уби брата своего меншего Хидырбека, и про то гневашеся на него старейший брат его Тинбек царь, Азбяков сын болший, и бысть вражда между их. <… >
В лето 6850(1342). Царь Ординский Чанибек, сын Азбяков, уби брата своего болшего Тинибека царя, а сам сяде на царствии, а преже сего убил меншаго своего брата; и тако всею Ордою, и всеми улусы и всеми землями властвоваше.<…> Того же лета князь великий Семен Иванович, внук Данилов, поиде во Орду к новому царю Чанибеку, Азбякову сыну. А князь Констянтин Суздалский, и князь Костянтин Тверский и князь Констянтин Ростовский, те все вкупе преже того поидоша ко царю во Орду. Того же лета и Феогнаст, митрополит Киевский и всея Руси поиде во Орду за причет церковный к новому царю Чанибеку, Азбякову сыну.<…> Того же лета выиде изо Орды князь великий Семен Иванович, внук Данилов. Того же лета прииде изо Орды от царя Чанибека Феогнаст, митрополит Киевский и всея Русин, ходил о причте церковнем, имаше бо и митрополит и епископы ерлыки на своя причты церковныа от царей Ординских. Неции же Русстии человеци оклеветаша Феогнаста митрополита ко царю Чанибеку, яко «много безчислено имать дохода, и злата, и серебра, и всякого богатства , и достоит ему тебе давати во Орду на всяк год полетные дани». Царь же проси у митрополита полетных даней; митрополит же не вдадеся ему в таковая. Царь же про то держа его в тесноте, митрополит же царю, и царице, и князем роздаде 600 рублев; и тако отпусти его царь со всеми его сущими на Русь, и прииде здрав со всеми своими.
В лето 6865 (1357). Царь Ардиньский Чянибек, Азбяков сын, взя Теврижьское царство.<…> А по блаженного Алексея, митрополита Киевского и всея Русии, прииде посол изо Орды от Чанибековой царици Таидалы, зовя его к ней во Орду, яко да шед посетит ея, бе бо немощна . Он же уготова потребное к путному шествию, и се о себе загореся свечя в соборней церкви митрополской Пречистыа Богородици у гроба святаго чюдотворца Петра. Он же пев молебен со священным собором, и свещу ту раздробив и раздаде народу на благословение, а сам поиде того дни во Орду. И Божиею милостию, и Пречистыа Богородици и великого чюдотворца Петра царицу Таидалу исцели, и тако вборзе изо Орды отпущен бысть, понеже в то время возстааше вражда и замятия велиа во Орде. Отпущен же бысть тогда изо Орды и посол именем Иткара на Москву по запрос ко всем князем Русским. Того же лета прииде посол от царя на Русь именем Кошак. Того же лета замятия во Орде не престааше, но паче воздвижашеся; бысть бо тогда князь темник во Орде у царя Чя нибека, Азбякова сына, мудр и силен зело окаянный Товлубий, соединися с сатаною, и восхоте всею Ордою владети и всеми землями. И нача во ухо шептати цареву сыну Чянибекову Бердибеку, хваля его и вознося, глаголя: «Яко время ти есть седети на царстве, а отцу твоему уже время снити с царства» и тако начя помалу советовати ему убити отца его Чанибека, Азбякова сына; и тако многих князей Ординьских привлекоша к себе в совет, обещевающи комуждо что дати. И тако царевичь Бердибек окаянный с лестию прииде ко отцу своему з думци своими, со князи Ординьскими, и удави отца своего Чянибека, Азбякова сына. Бе же сей царь Чянибек Азбяковичь добр зело к христианьству, и многу лготу сотвори земле Русстей; но суд ему сотворися, якоже он изби братью свою, тако же и сам тую же чашу испи. Сын же его Бердибек по нем сяде на царстве, и уби братов своих 12; окаанным князем, и учителем своим и доброхотом Товлубием нааставляем отца своего уби и братью свою поби, и помале паки и сам погибе и з думци своими.<…>
В лето 6867 (1359)<…> Во Орде убиен бысть царь Бердибек, сын Чянибеков, внук Азбяков, и с доброхотом своим окаанным Товлубием, князем темным и силным, и со иными советники его; и испи тую же чашу, еюже напоил отца своего и братью свою. И по нем сяде во Орде на царстве Кулпа, и царствова месяць 6 и дней 5, и много зла сотвори. И тако и сему не стерпе суд Божий, и убиен бысть от Науруса з двема сыны своими, с Михаилом и Иваном . И тако по Кулпе сяде во Орде на царство Наурус. В те же в бранные времена бысть во Орде князь Андрей Констянтинович, внук Васильев, и едва упасе его Бог от горкиа смерти от рук поганых. Того же лета поидоша во Орду к новому царю Науру су вси князи Русстии, и биша челом царю о разделении княжений их; и тако смири их, и раздел положи княжениам их, и знати им комуждо свое княжение, и не преступати.<…>
В лето 6868 (1360) <.. .> Князи Суздальстии приидоша во Орду к царю Наурусу: князь Андрей Констянтиновичь Суздальский, внук Васильев, и брат его Дмитрей Констянтиновичь, и приат их царь Наурус с честию, и даде великое княжение Володимерьское князю Дмитрею Констянтиновичю Суздальскому не по отчине, ни по дедине. А преже царь давал великое княжение Володимерьское старейшему его брату князю Андрею Констянтиновичю Суздальскому, и он по то не ялся и тако князь Дмитрей Константинович Суздалский взя великое княжение Володимерское, и отпущен бысть из Орды от царя с пожалованием и с честию на Русь с послом царевым. И въеха во Володи мерь на великое княжение за неделю до Петрова дня, месяца июня в 22 день, не по отчине, ни по дедине.<…>
Того же лета прииде с востока некий Заяицкий царь Хидырь на царство Волжское ратью, и бысть лесть во князех Ординьс ких Воложьскаго царства, и начата тайно ссылатися с Хидырем, царем Заяитцким, лукавьствующе на Воложскаго своего царя Науруса. И составися тайная лесть их в дело, и соступиша ся на бой, и выдан бысть от своих князей Воложский царь Науру с Заяицкому царю Хидырю. И тако убиен бысть и с сыном своим Тимирем; такоже и царица Таидала убиена бысть, и князи Ординстии, иже в любви и в совете быша Наурусу, царю Воложскому, Муалбузина чядь со множеством Татар их избиени быша. И тако по смерти Науруса, царя Воложского, сяде на Воложьском царствии Хидырь, царь Заяицкий, еже со востока прииде, и бысть тогда во Орде замятия велия.<…>
В лето 6869 (1361) <…> Поиде во Орду ко царю Хидырю князь великий Дмитрий Ивановичь Московский, внук Иванов, правнук Данилов, праправнук Александров, и Божиею милостию соблюдаем до замятии выиде изо Орды, понеже по отшествии его изо Орды возста замятия велиа во Орде. Того же лета поидоша во Орду ко царю Хидырю князи Русстии: князь великий Дмитрей Констянтиновичь Суздальский из Володимеря, и брат его старейший князь Андрей Констянтиновичь из Нивжнего Новгорода, и князь Констянтин Ростовский и князь Михайло Ярославьский; и бысть при них замятия велиа во Орде, и убиен бысть царь Хидырь, тихий и кроткий и смиренный , и с меншим сыном своим Кутлуем, от болшего сына своего Темирь Хози. И сяде на царстве Воложском Темирь Хозя, Хидырев сын старейший.<…> Того же лета князь Ординский, темник Мамай, воздвиже ненависть на царя своего, и бысть силен зело, и возста на царя своего на Темирь Хозю Хидырева сына, и замяте всем царством его Воложским, и приат себе царя именем Авдула, и бысть брань и замятия велиа во Орде. И в то время князь великий Андрей Констянтиновичь Нижнего Новгорода поиде изо Орды в Русь, и на пути дари на него князь Ретякоз, и помо же Бог князю Андрею Констянтиновичю Нижнего Новагорода, и приде здрав на Русь. И мнози князи Русстии в то время изо Орды избежаша, а Ростовстии князи граблени избежаша. А царь Заволожьский Темирь Хозя, Хидырев сын, у бежа за реку за Волгу и там убиен бысть, седев на царствии точию месяць один и седмь дний, и тую же чашу импи, ею же напоил отца своего Хидыря и брата своего меншаго Кутлуя. И тогда князь Мамай во мнозе силе преиде за реку за Волгу на горнюю страну, и Орда вся с ним, и царь бе с ним именем Авдула. И тогда третий царь возста именем Килдибек, творяшеся сыном Чанибека царя , внука Азбяка царя, и той добиваася царства Воложьскаго, и многих поби, последи же сам убиен бысть. И тогда мнози князи Сарайстии затворишася в Сараи, царя у себе именующе Амура та, Хидырева брата царева; а Булат Темирь, князь Ординьский, Болгары взял, и все грады по Волзе и улусы поймал, и отня весь Воложьский путь. А иный князь Ординьский именем Тогай, иже от Бездежа, той убо Наручад и всю ту страну взял, и тамо о себе пребываше; а инии князи Ординстии о себе пребываху. И бысть в них глад велий, и замятия многа, и нестроение всегдашнее, и не престаяху межи собою ратующеся, и биющеся и кровь проливающе. Тако убо Бог попусти на них гнев свой, милуя раб своих, смиренных православных христиан.<…> Того же лета князь Мамай брань сотвори с Омуртом царем и со всеми князи Сарайскыми, и многих князей Ординских старых изби.
В лето 6870 (1362). Мамаю князю бысть бой велий со Амура том царем о Волзе. Того же лета Амурат царь изгоном прииде на Мамаа князя, и многих у него Татар побил. Бысть в та времена на Воложском царствии два царя: Авдула царь Мамаевы Орды, его же князь Мамай темник устроил в своей Орде царя, а другий царь Амурат с Сарайскими князи. И тако те два царя и те две Орды, мал мир имеющи, межи собою всегда во враждах и в бранех.
