Приговор о монастырских слободах 1550 года

ПРИГОВОР О МОНАСТЫРСКИХ СЛОБОДАХ 1550 ГОДА
Лета 7059-го сентября в 15 говорил со царем и великим князем отец его Макарей митрополит всея Русии.
Приговорил еси, государь, прежде сего с нами, с своими богомольцы, со архиепископы и епископы, о слободах о наших митрополичьих и о архиепископлих и епископлих, и о монастырских, что слободам всем новым тянути з городцкими людми во всякое тягло, и з судом. И мы и ныне тот приговор помним.
В новых слободах ведает Бог да ты, государь, опричь суда. А ныне наместники твои царевы государевы, и волостели возле тех новых приходцев и старых слобожан хотят судити, и в том тем слобожаном нашим запустети. А преже того, государь, твои наместники и волостели наших слобожан не суживали. И ты бы, государь, своим наместником и волостелем и впред наших слобожан не велел судити.
А ныне твой царской приговор с нами, что в те в новые слободы вышли посадцкие люди после описи, и тех бы людей из новых слобод опять вывести в город на посад. И о том ведает Бог да ты, государь, как тебе о них Бог известит. А впред бы митрополитом и архиепископом [и епископом] и монастырем держати свои старые слободы по старине, о суде и о всяких делех по прежним грамотам. А новых слобод не ставити и дворов новых в старых слободах не прибавляти, развее ото отца детем, или от тестя зять, или от брата братьи выставливатися и своими дворы жити. А опричним прохожим людем градцким и селским в тех старых слободах новых дворов не ставити. А в которых в старых слободах дворы опустеют, и в те дворы называти людей пашенных и непашенных по старине, как преже сего было. А отказы-вати тех людей о сроце о Юреве днии о осеннем по цареву указу по старине же.
А с посаду впред городцких людей в слободы и не приимати, развее казаков нетяглых людей. А из слобод из митрополичих, и из архиепископ л их, и из епископлих, и из монастырских, которые христиане похотят итти во град на посады или в села жити, и тем людем итти о сроце же о Юреве днии со отказом по нашему указу царьскому.