1649-61. Универсалы Мгарскому монастырю

ОТНОШЕНИЯ МЕЖДУ МОНАХАМИ МГАРСКОГО МОНАСТЫРЯ И ЛУБЕНСКИМИ КОЗАКАМИ В 1649-1661 ГГ.
№ 1.
Универсал Богдана Хмелницкаго, жебы священников и монахов свецкие зневажать не важилися.
Богдан Хмелницкий, гетман войска его крол[евскои] м[илости] запорозкого.
До ведомости доносим кождому, кому колвек буде ведати о том, меновите паном полковником, сотником, атаманом, козаком войска его кролевской милости запорожского, от старших до найменших, иж его милость в Бозе ясне превелебний отец митрополит Киевский православний, пастыр наш, ускаржалми-ся писанием своим през велебного господина отца Калистрата, игумена Мгарского, наместника своего над священниками в всей менуючойся маетности князя Вишневецкого на Заднепру о то, иж некоторие з товариства нашего, козаков войска его кролевской милости запороского, смеют и важатся непристойне над годность свою не тилко в справы духовние церковние священнические ся втручати, але и самых тых священников, духовных отцов своих, не тилко зневажати, але и здоровя их позбавляти, яко мне о том дано знати, же на розных местцах до килку на сту особ мало о смерть, биючи, забиваючи, не приправлено. Прето я владзою гетманства моего, а именем всего войска, таковим смелцом за оскарженем-ся и доводом слушним не тилко [66] о бите, але и о наймнейщую (sic) словную в непристойном поступку зневагу на духовных богомолцов наших, росказую такових на горле карати и до мене таковие справи не доносячи, що приказую паном полковником моим миргородскому и прилуцкому, абы таковое справы перестерегали, чего не дай, Боже, если бы притрафило; а еслибы теж мел в чом кому священник винним зоставати, – оскаржить его старшому его, а о справедливость пристойне просить так, яко и они в нас; а самому себе справедливости з духовного абы жаден не чинил, под карностю вишей описанною, без всякого милосердия абы был каранний.
При сем вас Господу Богу поручаю.
З Чигирина, року * (1649), месяця февруария, дня * (23).
У подлинного универсалу тако подписано:
Богдан Хмелницкий рукою власною. (М. П.).

№ 2.
Универсал гетмана Богдана Хмелницкого о караню полковнику миргородскому чинящих монастыреве утиск.
Богдан Хмелницкий, гетман, з войском запорозским.
Ознаймуем сим писанием нашим кождому, кому бы о том ведать належало, меновите паном полковником, асавулом, сотником, атаманом и всему товариству войска нашего запорозского, иж оповедали нам и ознаймили от велебного господина игумена монастира Мгарского, же некоторие своеволники, запомневши боязны Божой, великие утиски и кривди монастиреве тамошнему и черцом, в нем мешкаючим, чинят и их зневажают, так до монастира приежжаючи купами не для побожности християнской, але для лупезства, до монастира gвaлтoм напираются. Прето мети хочем и вдадзею нашею гетманскою приказуем, абы таких своеволников, которие бы найменшую кривду местцу святому чинили и в пожитки, млини, поля, сеножати, належачие до монастира, втручались, полковник наш наказний вешал, стинал и ведлуг слушности карал. А если бы им фолкговал, а нас найменшая бы мела скарга дойты, жебы се якая кривда деяла помененному монастиреве Мгарскому, теды сам за тое от нас будет каранъний.
Дан з табуру з под Зборова, дня * (9) мая, року * (1651).
У подлинного тако подписано:
Богдан Хмелницкий рукою власною. (М. П.)
Иоан Выговский писар войсковий.

№ 3.
Уневерсал Иоана Виговского, гетмана, оборонний на лес и луку Ксендзовскую и луг,
и перевоз на Лисой Горе.
Иоан Виговский, гетман, з войском его царского вел[ичества] запорозким.
Пане полковнику Лубенский! Скарга нас дойшла от отцев Мгарских, иж там немалую кривду так от козаков полку в. м., яко и посполитих людей в лесе, до монастира належачом, так же и в луце Ксендзовской, и в спустошеню луга, и в иних кгрунтах монастирских поносят. Пилно затим вас жадаем и приказуем, абы в. м. того наддер (sic) пилно постерегали, яко бы болшей отцеве Мгарский в тих кгрунтах своих, особливе в лесе, луце Ксендзовской, лузе и перевозе, на Лисой Гори найдуючомся, ни от кого найменшой кривди и перешкоди не поносили, и поддание монастирские до жадних повинностей през в. м. абы потягани не били, не чинячи иначей под срокгим каранем войсковим, также бы нас найменшая николи скарга о том не доходила.
Дат (sic) в Чигирине, апреля, дня * (12), року * (1658).
В подлинном подпис таков:
Иоан Виговский. (М. П.)

№ 4.
Уневерсал Иоана Виговского оборонний на луки Ксендзовские, иже бы впред козаки ченцов не ругали и не похвалялися, и жебы оуневерсалам гетманским не были противни.
Иоан Виговский, гетман, з войском его царского вел[ичества] запорозким.
Пане полковнику Лубенский! Дивуемося тому барзо, же вшъм. легце поважаешь у себе наши оуневерсали (чего-бы-смо и не сподевалися з в. м.), чинячи похвалки на отца игумена и чернцов Мгарских и недопускаючи оним луки, од нас на манастир Мгарский наданной, косити; для чого вам приказуем, абысте жадной оним не чинили перешкоди в луце и незбороняли оуживати и болш на чернцов не похвалялися, ведаючи о том, же кождий воле нашой противник и зневажаючий оуневерсали, нашого срокгого войскового караня не уйдет, чого и в. м. постерегайтес, абысте ласки нашой незбили, что и повторе вам приказуем, жебы-сте не были перешкодою в оной луце, для ласки нашой, иначей абы не было.
Дан в Чигирине, дня * (18) июля, року * (1658).
В подлинном подпис таков: Иоан Виговский (М. П.).

№ 5.
Юрый Хмелницкий, гетман, з войском его царского величества запорозким.
П. атамане лубенский Павле! Пришла на тебе до нас, до табуру скарга от велебного отца игумена Мгарского, же ся воле его милости пана отца добродея моего спротивляючися, луку Ксензовскую, на монастирь Мгарский наданную, покосилес, а еще мало на том маючи, тогож велебного отца игумена Мгарского зневажилес; глядячи на тебе и Полоней в леску перешкоду чинить. Прето ж росказуем тобе сурово, под каранем войсковим, абыс найменшой перешкоды в той луце отцу игуменови Мгарскому не чинил, теди ведаеш, же кто на чужом кгрунте косит, – то не собе косит; зачим и ты не для себе косил, але на монастир, однакож кошт, щось на косаров уложил, тобе от отца игумена вернений будет, а другий раз не важся косити, да и игумена не зневажай, бо сам в зневагу попадеш, так же и Полонею кажи, нехай в леску перешкоды не чинит, а що он за козак: мы у войску, а он – дома! Коли козак – нехай у войско идет, запевне горла неуйдет; абы теды иначей не были, сурово приказуем.
Дан в табуре на вершинах Ташлицких, июля * (8), року * (1661).
В подлинном подпис таков:
Юрий Хмелницкий, рука власна.