1657. Охранный универсал, выданный Львову Б. Хмельницким

ОХРАННЫЙ УНИВЕРСАЛ, ВЫДАННЫЙ ГОРОДУ ЛЬВОВУ
БОГДАНОМ ХМЕЛЬНИЦКИМ 1657 МАРТА 9.
Богдан Хмельницкий Гетман з войском его Царского пресветлого Величества Запорожским. Ознаймуем сим писанием нашим каждому, кому о том ведати належит, а меновите: пану Антонови, наказному нашому, и при ним будучим полковником, ассаулом, сотником, атаманом и залогам, по мистам будучим, всем старшим и черни войска нашего Запорозского и всему нашому товариству. Иж якосьмы через першое постановление року прошлого мисто Львов зо всими обывателями взяли в свою оборону, обечуючи их, поки бы верне ся и водлуг слова, ку нам преречоного заховывали, од всяких як своего, так и чужого войска наездов заступати; так и тепер сурово приказуем, абы ся жаден, так з пеших, яко и комонных не важыл ся набегати, або произдом яким колвек способом, ани в домах шарпати, але овшем, абы ся з людьми миста Львова як з власными нашими обходили, до всякого гандля и купецтва не чинячи перешкоды. Иначей гдыбы хто мел з ними поступовати над выразное наше росказание и тое бы до нас доношено, сурове таковый каждый без фольги и отпусту караный будет водлуг заслуги и учинку своего, бы теж и на горли. Дань в Чигрине дня 9 марта, року 1657. Богдан Хмельницкий рука власна.