1704. Универсал гетмана Мазепы

УНИВЕРСАЛ ГЕТМАНА МАЗЕПЫ, 1704 Г.
Пресветлейшего и державнейшего великого государя нашего его царского величества войска Запорожского Гетман и славного чина святого апостола Андрея кавалер Иоан Мазепа.
Сим всему старшому и меншому войска Запорожского бывшого Палеевого полку товариству, и всем кому зыколвек до обывателей ростовских и инных о том ведати належало сим уневерсалом нашим ознаймуем; иж отдаливши мы, для певных причин, пана Семена Палея от уряду полковникства, вручилисмо тот уряд полковничий Пани Михайлу Омельченкови, иако справному и благоразумному человекови, позволяючи оному межи вами порядки управляти, и все, що колвек належит до оного старшенства, справовати. За чим делаючи о таковой воле нашей, и бысте вы все належите оному отдавали послушение и всякую, яко старшому своему, оказовали поволность во всем стосуючисы до указу нашого. Он же, яко есть справный и благорассудителный человек, так знатимет, як добрых миловати и на оных респект оказовати, а злих и проступних слушным каранем наказовати подлуг права и строгии справедливости. Такой воле нашой, абы во всем чинилося заочно пилно, сим же уневерсалом нашим приказуем. Дан в обозе, под Бердичовом, августа 10-го, року 1704. Войска Запорожского Гетман и кавалер Иван Мазепа.