1651. Универсал Б. Хмельницкого

«Богдан Хмельницкий, гетман, з войском его кор. мл. Запорожским.
Ознаймуем тым писаннем нашым кому ведаты надлежит, меновыте, сотникови и атаманови и всем обывателям Чигрин-Дубровским места Чигрин-Дуброва и сел до него належачих: поневаж маетности до монастыра с-того Николи-Пустиннаго Киевского з давних лет от побожных ктиторов, панов и христиан благочестивых наданые и местцу с-тому оферованые, а от королев стверженые привилеями и потом через панов отнятые и от местца с-того отдаленые, о чем декреты судовые, в книгах земских и гродских и трибуналских переведение и до экзекуцыи и интромесии приведеные сведчат; для чого местце святое през час немалый много шкод поносило; а теперь, видячи мы, же тые маетности, декретами присуженые, помененому монастыреви належат ведлуг привилеов давных; теды, яко иншои шляхты добра свое волно обыматы, так и монастыра вышей-речоного игумен и капетула отнятые и присуженые местцу с-тому добра обымают и свои урядники посилают; протож росказуем, абы в месте Чигрин-Дуброви и селах там належачих вси тые, которые колвек в реестр войска Запорожского написаны послушенство звыклое отдавали и яко поданные повынности своей досыт чинили и ни в чем спречними и противными не были урядникам и старшим, от игумена и капитулы монастыра Никольского посланным; а если бы якие иншие урядники хотели наеждчать до Чигрин-Дуброви и до сел, до него належачих, с теми не задирать и ничего не починать без ведомости и позволеня игумена и капитулы монастырской, кгдыж кождый мает волное право в судах ведлуг прав и привилеев распиратся, в чем всем козаки не мають быти перешкодою, а овшем радою и помочу, в млины, аренды, шинки и в иншие монастирские пожытки не втручаючися, бо пред тым козаки морем и землею праци своеи шаблею поживенье мели и церкви божие надаряли; и повторе напоминаем, абысте иначей не чинили под караньем суровым. В Чигирине, 1-го ноября 1651 года. В подлинном подписано тако: Богдан Хмельницкий, рука власна. М. П.».