1653. Универсал Б. Хмельницкого

Богдан Хмелницкий, гетман, з войском Запорозским.
Ознаймуем сым нашим писанем обывателем преорским и козаком, иж мещане киевъские, яко од давных часов до майстрату киевъского кгрунта и сеножати мают наданые и оные правами держат, и теперь мети хочем, абы в оных жадное одмены (першею ласкою нашею упевнены) не мели, кривды, принагабаня найменшого ни од кого абы не терпели в оных сеножатях, так на Оболоню, яко и индей, где толко свои кгрунта мают и оных от давных часов заживают, жаден силомоцне, так з козаков, яко и поспулства, оные собе привлащаючи, косыти абы се не кусыл, сыи писанем нашим сурове росказуем. А ежели бы которий своеволник, спротивляючисе воле и сему выразному нашему писаню з обывателей ореорских албо з козаков в надею козацьства мел бы якую найменшую кривду албо перешкоду в оных сеножатях помененым мещаном киевским чинити и оные неналежъне кусил се собе привлащати, таковых мы теды кождого томуж пану полковныкови киевъскому сурове без холкгы карати росказуем, иначей не чинячи. Дат. з под Бару, июня 2, року 1653.

Богдан Хмелницкий,
рука власна. (М. П.)