Духовная грамота Ивана Ивановича

ДУХОВНАЯ ГРАМОТА ВЕЛИКОГО КНЯЗЯ ИВАНА ИВАНОВИЧА
Около 1358 г.
Первый экземпляр
Вo имя Отца и Сына и Святаго Духа, се яз, грешный худый раб Божий Иван Ивановичь, пишу грамоту душевную, ничим же не нужен, целым своим умом, в своемь здоровье. Аже что Бог розмыслить о моемь животе, даю ряд своим сыном, князю Дмитрию и князю Ивану, и своему братаничу, князю Володимеру, и своей княгине.
Приказываю отчину свою Москву сыном своим, князю Дмитрию и князю Ивану. А братаничу моему, князю Володимеру, на Москве в наместничтве треть, и в тамзе, в мытех и в пошлинах городских треть, что потягло к городу. И что мед оброчный Василцева стану, и что отца моего купленые бортници под вечные варях, и кони ставити по станом и по варям, и конюший путь, то им все на трое. А численые люди вси три князи блюдуть сопча с одиного.
А се даю сыну своему, князю Дмитрью: Можаеск со всеми волостми, и с селы, и с бортью, и с тамгою, и со всеми пошлинами, Коломну со всеми волостми, с тамгою, и с мытом, и селы, и с бортью, с оброчники, и с пошлинами.
А что ис тых волостий за княгинью за Марьею, те волости до ее живота и села, а по ее животе те волости и села сыну моему, князю Дмитрью: Городна, Мезыни, Песочна, Середокоротна, Похряне, Усть-Мерьска, Брашевая, Гвоздна, селце Ивань, деревни Маковець, Левичин, Скулнев, Канев, Кошира, Гжеля, Горетовка, Горки, село на Северсце, село Малино, село Холмы, село Костянтиновское, село Орининьское, село Островьское, село Копотеньское, село Микульское, село Малаховьское, село Напрудьское, село Илмовьское, село Новое, Мещерка у Коломны.
А се даю сыну своему, князю Ивану: Звенигород со всеми волостми, и с мытом, и с селы, и с бортью, и с оброчники, и с пошлинами, Кремична, Руза, Фоминьское, Суходол, Истерва, Сводка, свободу Замошьскую, Ростовци, Кремичну, Тростну, Негучу, село Рюховьское, село Михалевьское, село Каменьское, село на Репне в Боровьсце, селце Милциньское, село Максимовьское, село в Замошьской свободе, село Выславьское, село Кузминьское, село Демонтовское, село Андреевьское, село Кариньское, село Козловьское.
А братаничь мой, князь Володимер, ведает уезд отца своего.
А что ся мне достали места Рязаньская на сей стороне Оки, ис тых мест дал есмь князю Володимеру, в Лопастны места, Новый городок на усть Поротли, а иная места Рязаньская отменьная сыном моим, князю Дмитрью и князю Ивану, поделятся наполы, без обиды.
А княгини Ульяна, пo отца моего, князя великого, по грамоте по душевной, ведаеть волости, и осмничье, и села до своего живота, а по ее животе дети мои, князь Дмитрий и князь Иван, и братанич князь Володимер, и моя княгини поделятся на четверо, без обиды.
А ци по грехом, имуть искати из Орды Коломны, или Лопастеньских мест, или отменьных мест Рязаньских, а по грехом, ци отъимется которое место, дети мои, князь Дмитрий и князь Иван, князь Володимер, и княгини в то место поделятся безъпеньными месты.
А се дал есмь княгини своей Олександре ис Коломеньских волостий: Похряне, Песочну, Середокоротну, село Лысцевьское, да на Москве селце Семциньское. А и Звенигородских волостий дал есмь своей княгине: Угожь, Великую свободу Юрьеву, село Кляповьское, село Белциньское с Новым селцем.
А ис тамги ис московьское княгине моей у моего сына, у князя у Дмитрия, и у князя у Ивана из дву жеребьев треть. А по животе моее княгини те волости, и села, и треть тамги дастся сыну моему, князю Дмитрию, и князю Ивану, в которого уезде, то того и есть.
А се даю сыну своему, князю Дмитрию: икону святыи Олександр, чепь золоту врану с крестом золотым, чепь золоту колчату, икона золотом кована Парапшина дела, шапка золота, бармы, пояс великий золот с каменьем с женчуги, что мя благословил отець мой, князь великий, пояс золот с крюком, сабля золота, обязь золота, и серга с женчугом, чечак золот с каменьем с женчуги, 2 овкача золота, ковшь великий золот гладкий, коропка сердонична золотом кована, бадья серебрена с наливкою серебреною… с каменьем, опашень скорлатен сажен.
А се дал есмь сыну своему, князю Ивану: чепь великую золоту с крестом, чепь золоту врану, а другая огнивчата с кресты, икону Благовещенье, и сергу с женчугомь, пояс золот с каменьем с женчуги, что ми дал брат мой, князь великий Семен, пояс золот сточный, алам женчужный, наплечки золоты с круги с каменьем с женчуги, алам малый с женчуги, что ми дала княгини Марья, ковшь великий золот гладкий, овкачик золот, чашка золота, дастокан царьгородский золотом кован, чечак золот с каменьем с женчуги, сабля золота, обязь золота.
А кого ми дасть Бог зятью, по чепи им по золоте, по поясу по золоту.
А что за княгинью за Марьею Заячков, Заберега с месты, то до ее живота, а по ее животе моей княгине.
А чтo волости за княгинью за Ульяною, ис тых волостий по ее животе дети мои, князь Дмитрий, князь Иван, князь Володимер, дадуть дчери ее Сурожик, село Лучиньское.
А из моих судов и серебреных дадуть блюдо серебрено великое с колци к святей Богородици Володимерь.
А иными суды серебреными дети мои, князь Дмитрий, князь Иван, своею матерью поделятся на трое.
А село на Рокше Романовьское князю Дмитрию.
А село Афиньевьское да селце у Павловьского села князю Ивану.
А село Павловьское дал есмь святому Олександру впрок, собе в память.
А что моих стад коневых, и жерепцев, и кобылиць, а то сыну моему, князю Дмитрию, и сыну моему, князю Ивану, то им наполы.
А ис тамги ис коломеньское дал есмь четвертую часть к святей Богородици на Крутицю, собе в память. А костки московьскии дал есмь на Москве к святей Богородици и к святому Михаилу, в память по своемь отце, и по своей братьи, и по собе, то им руга.
А хто будеть моих казначев, и тивунов, и посельских, или хто будеть моих дьяков, что будеть от мене ведали прибыток ли который, или хто будеть у тых женился, те люди не надобни моим детем, ни моей княгини, дал есмь им волю. Тако же хто будеть моих людий полных, купленых, грамотных, дал есмь им свободу, куды им любо. А детем моим не надобны, ни моей княгини.
А на сю грамоту послуси: отець мой, владыка ростовьский Игнатий, отци мои душевные, игумен Иван, поп Акинф, поп Патрекей.
А хто сю грамоту порушить, судить ему Бог, а моего благословеньа не буди ни в сий век, ни в будущий.
А грамоту писал Нестерко.
На лицевой стороне грамоты привешена серебряная позолоченная печать великого князя Ивана Ивановича.
Второй экземпляр
Вo имя Отца и Сына и Святаго Духа, се яз, грешный худый раб Божий Иван Иванович, пишу душевную грамоту, ничим же не нужен, целым своим умом, во своемь здоровье. Аже что Бог розмыслить о моемь животе, даю ряд своим сыном, князю Дмитрею и князю Ивану, и своему братаничу, князю Володимеру, и свои княгини.
Приказываю отчину свою Москву сыном своим, князю Дмитрью и князю Ивану. А братаничу моему, князю Володимеру, на Москве в наместничтве треть, в тамзе, в мытех, и в пошлинах городских треть, что к городу потягло. И что мед оброчный Василцева стану, и что отца моего бортници купленые под вечные варях, и кони ставити по станом и по варям, и конюший путь, то им все на трое. А численые люди вси три князи блюдуть сопча с одиного.
А се даю сыну своему, князю Дмитрью: Можаеск с волостьми со всеми, с тамгою, и с селы, и с бортью, и со всеми пошлинами, Коломну со всеми волостьми, и с тамгою, и с мытом, и с селы, и с бортью, и со всеми пошлинами.
А что и с тых волостий за княгинью за Марьею, а те волости до ее живота, а по ее животе те волости сыну моему, князю Дмитрью: Городна, Мезыни, Песочна, Середокоротна, Похряне, Усть-Мерьска, Брашевая, Гвоздна, селце Ивань, деревни Маковець, Левичин, Скулнев, Канев, Кошира, Гжеля, Горки, Горетовка, село в Похряньском уезде на Северсце, село Малино, село Холмы, село Костянтиновьское, село Орининьское, село Островьское, село Копотеньское, село Микульское, село Малаховьское, село Напрудьское, село Илмовьское, село Новое. А ис тых сел, которая будуть за княгинью за Марьею села, те до ее живота, а по ее животе те села сыну моему, князю Дмитрью, Мещерка у Коломны.
А се даю сыну своему, князю Ивану: Звенигород со всеми волостми, и с мытом, и с селы, и с бортью, и с оброчники, со всеми пошлинами, Кремична, Руза, Фоминьское, Суходол, Истерва, Сводка, свободу Замошьскую, Ростовци, Кремичну, Тростну, Негучу, село Рюховьское, село Михалевьское, село Каменьское, село на Репне в Боровьсце, селце Милциньское, село Максимовьское, село Демонтовьское, село Андреевьское, село Кариньское, село Козловьское, село в Замошьской свободе, село Выславьское, село Кузминьское.
А братаничь мой, князь Володимер, ведаеть уезд отца своего.
А чтo ся мне достали места Рязаньская на сей стороне Оки, ис тых мест дал есмь князю Володимеру, в Ломастны места, Новый городок на усть Поротли, а иная места Рязаньская отменьная сыну моему, князю Дмитрию, и князю Ивану, поделятся наполы, без обиды.
А княгини Ульяна, по отца моего, князя великого, грамоте по душевной, ведаеть волости, и осмничье, и села до своего живота, а по ее животе те волости, и села, и осмничье детем моим, князю Дмитрию, и князю Ивану, и князю Володимеру, и моей княгине, поделятся на четверо, без обиды.
А ци по грехом, имуть из Орды искати Коломны, или Лопастеньских мест, или отменьных мест Рязаньских, а ци по грехом отоимется которое место, дети мои, князь Дмитрий, и князь Иван, и князь Володимер, в то место, и княгини поделятся безпеньными месты.
А се дал есмь княгини своей Олександре ис Коломеньских волостий: Похряне, Песочну, Середокоротну, село Лысцевьское, село Семциньское на Москве. А и Звенигородских волостий дал есмь княгине же своей: Угожь, Великую свободу Юрьеву, село Кляповьское, село Белциньское с Новым селцем.
А ис тамги ис московьское княгине моей у моего сына, у князя у Дмитрья, и у князя у Ивана из дву жеребьев треть. А по животе моее княгини те волости, и села, и часть тамги сыном моим, князю Дмитрью и князю Ивану, в которого уезде, то того и и есть.
А се дал есмь сыну своему, князю Дмитрью: икону святыи Олександр, чепь золоту великую врану с крестом золотым, чепь золоту колчату, икона золотом кована Парамшина дела, шапка золота, бармы, пояс великий золот с каменьем с женчуги, что мя благословил отець мой, князь великий, пояс золот с крюком, обязь золота, сабля золота, и серга золота с женчугом, чечак золот с каменьем с женчуги, 2 овкача золота, ковшь великий золот гладкий, коропка золотом кована сердонична, бадья серебрена с наливкою серебреною… ца золота с каменьем, опашень скорлатен сажен.
А се дал есмь сыну своему, князю Ивану: чепь великую золоту с крестом, чепь золоту врану, а другую огнив…чату с кресты, икону Благовещенье, и сергу с женчугом, пояс золот с каменьем с женчуги, что ми дал брат мой, князь велики Семен, пояс золот сточный, алам сженчужный, наплечки золоты с круги с каменьем с женчуги, алам малый с женчуги, что ми дала княгини Марья, ковшь великий золот гладкий, овкачик золот, чашка золота, достокан царьгородский золотом кован, чечак золот с каменьем с женчуги, сабля золота, обязь золота.
А кого ми дасть Бог зятью, по чепи им золоте да по поясу по золоту.
А чтo за княгинью за Марьею Заячков, Заберег с месты, то до ее живота, а по ее животе моеи княгине.
А что волости за княгинью за Ульяною, ис тых волостий по ее животе дети мои дадуть дчери ее Сурожик, село Лучиньское.
А из моих судов серебреных дадуть к святей Богородици Володимерь блюдо великое сереброно с колци.
А иными суды серебреными дети мои, князь Дмитрий и князь Иван, своею матерью поделятся на трое.
А село на Рокше Романовьское князю Дмитрью.
А князю Ивану село Афиньевьское да селце у Павловьского села.
А село Павловьское дал есмь святому Олександру впрок, собе в память.
А что моих стад коневых, и жерепцев и кобылиць, а то сыну моему, князю Дмитрью, и князю Ивану, то им наполы.
А ис тамги ис коломеньское четвертую часть дал есмь к святей Богородици на Крутицю, собе в память. А костки московьскии дал есмь к святей Богородици и к святому Михаилу, в память по своемь отце, и по своей братьи, и по собе, то им руга.
А хто будеть моих казначеев, или тивунов, или посельских, или хто будеть моих дьяков, что от мене будеть ведали прибыток ли который, или у тых хто будеть женился, те люди не надобни моим детем, ни моей княгини, дал есмь им волю. Так же хто будеть моих людий купленых, грамотных, полных, дал есмь им свободу, куды им любо. А детем моим, ни моей княгини не надобни.
А на сю грамоту послуси: отець мой, владыка ростовьский Игнатий, отци мои душевные, игумен Иван, поп Акинф, поп Патрекей.
А хто сю грамоту порушить, судить ему Бог, а не буди на немь моего благословенья ни в сий век, ни в будущий.
А грамоту писал Нестерко.
На лицевой стороне грамоты привешена серебряная позолоченная печать великого князя Ивана Ивановича.
Основание для датировки: связь духовной с летописным известием 1358 г. о том, что ордынский посол Мамат-Хожа присылал к московскому князю о «розъезде земли Рязанской» (ПСРЛ, т. VIII, стр. 10).
Выверено по изданию: Духовные и договорные грамоты великих и удельных князей XIV-XVI вв. Подготовлено к печати Л.В. Черепниным. – М.-Л.: Издательство Академии наук СССР, 1950.