Устав Владимира Святого о церковных судах

Устав Владимира святого о церковных судах .
Се яз князь Володимер поставих церковь святыя Богородица в Киеве и дах церкви той десятину по всей Русской земли во всех градех . И по сем сгадал есмь с своею княгинею с Анною и с своими детьми, оже сих судов не надобно судити князю, ни бояром, ни судиям их, и дах те суды церквам, всем епискуниям по Русской земли; а по сем не вступатися ни детем моим, ни внучатом, ни всему роду моему до века ни в люди церковныя, ни в суды их, то все дал есмь но всем градом и по погостом и по свободам, где христиане суть : роспусть, смильное, заставанье, пошибенье промежу мужем и женою о животе, в племени или в сватовстве поймутся, ведьство, зелийничьство, уреканье три: бляднею и зельи и еретичеством, зубояжа , отца или матерь бьет сын или дчи, братни ли дети тяжются о задници , церковная татьба, мертвецы волочать , крест посекуть , или на стенах режут , скоты или псы и поткы без велики нужи введет, или что неподобно в церкви подеет . Те вся суды церкви даны суть. Князю и бояром и судьям в те суды не лзе вступатися. То вся дал есмь по первых царев уряженью и по вселенскых святых отец семи съборов великих святитель . Аще кто преобидит наш устав, таковым непрощеным быти от закона Божия и огнь себе наследуют . Иже искони уставлено есть и поручено святым епископиам городскыя и торговыи всячьская мерила и спуды и свесы и ставила ; от Бога тако искони уставлено епископу блюсти без пакости, ни умалити ни умножити; за все то дати ему слово в день суда великаго, яко и о душах человечьскых. А се церковные люди: игумен, поп, диакон, и кто в клиросе, черньц, черница, попадия, проскурница, поповичь, лечец , прощенник , задушый человек , монастыреве, больници, гостинници, странноприимници то люди церковныи, богадельные, митрополит или епископ ведает межю ими суд или обиду, или котора, или задница. Аже будет иному человеку с тем речь, то обчий суд.