Судебник короля Казимира

СУДЕБНИК КОРОЛЯ КАЗИМИРА ЯГЕЛЛОВИЧА, ДАННЫЙ ЛИТВЕ, 1468Г., ФЕВР. 29 .
Казимир, Божьею милостью король полскый, великый князь литовьскый и руский, княжа прусское, и жомоитьскый, и иных, чиним знаменито сим нашим листом , кто на н посмотрить, или чтучи услышить, ижь мы с князьми и с паны-радою нашею великого князьства Литовскаго и с всим поспольством согадавши, урядили есмо так:
1. Што с лицом приведуть татя, будеть ли мочи чим платити, ино заплатити истинну; пак ли чего у дому не будеть, а будеть ли то жона ведала з детьми ужо изрослыми, ино жоною и детми заплатити, а самого на шибеницю ; а што бкдкть малыи дети, ниже семи годов, тыи в том невинни .
2. А пак ли злодей не имети будеть чим платити, ино и лица у двор не имать, воротити истьцю, у кого украдено, просокы половину верънути; а злодеа на обешение, а просока по старому .
3. А в кого будеть украдено, и што судьи присудять: ино прво заплатити истьцю, а потом осподарь татя того вину свою бери .
4. А коли выдадуть жону, а любо дети татиныи, а у колце судьи скажют, а потом возмогут ли ся выкупити, а любо осподарь их усхочет выкупити: и они могуть ся выкупити. А будеть ли в дому статков татя того, и он домовыми статкы плати: оли ж бы не было чим платити из дому, ино жоною и детьми платити, как у верху писано .
5. А коли бы злодей што у кого украл, а и где украдено, а там его ухватят с лицом, а он у дом не принесл, жона и дети того не поживали: злодей терпи, а жона и дети и дом их невинен .
6. А коли злодей из дому вышел, и украдеть што и потеряет, а любо што изъесть, а кроме жоны и детей: ино домовыми статкы, што того татя влостное, заплатити; а жона и дети и статкы женьни от того порожни .
7. А коли чий человек у злодейство упадеть, а будеть осподарь его тое ведал, а любо и с ним удел имел, а будеть на то довод: и тот так терьпи, как который злодей.
8. А который будеть лежьни держати у своем дому тайно, а суседем околици не оповедаеть, а в том часу што у кого изгынеть; а будеть на то довод, ижь лежьни дрьжал: ино дати тому рок, и другий, и третий, ижь бы того лежьня поставил, ли с себе извел; а пак ли на рок на последний не поставить, заплатиж, а того ищи; а нашод к праву поставити : не деи исправляется, а то уже заплачено.
9. А коли бы наш человек вину дал князьскому или паньскому или борярьскому человеку, а в котором повете, под нашим наместничьством или тивуньством: ино нашему наместнику, а любо тивуну, обослати, ижь бы нашому человеку стало ся право; а пак ли усхочеть на обчий суд , ино их на обчий суд пустить и рок дати.
10. А будуть ли на нашом человеце князьскыи или паньскыи или боярьскыи люди чого искати: ино тому суд и право перед нашими наместьникы и тивуны, который от нас где што дръжить ; а нашим урядником дати право на обе стороне.
11. А которому человеку князьскому или паньскому или боярьскому до князьскых и до паньскых или до боярьскых людей дело; ино хто ищеть на ком, ехати ему искати правом пред осподарем его; а не уделаеть ли права , ино обчий суд, рок положив со обу сторон, а тогды уделати и справедливость. Пак ли будеть некоторый отводити , ино нам дати децького; а не пригодить ся нам в великом князьстве Литовьском, ино воеводам нашим моцно дати децького.
12. А коли злодея выдадуть ис права , и чим его възвелять, казнити по его делом. А кому татя выдадут, и тот не въсхочеть его казнити, а усхочет на нем заплату побрати, а его пустити, а любо его собе в неволю възяти, а на то будеть довод: тот уже ис права выступаеть, и нам и с паны. радою нашою великого князьства Литовьского о том погадав , как его казнити, а и сказнити его, чого будеть достоин. А над злодеем милости не надобе .
13. А кто украдеть выше полукопья , а любо корову, того узвесити .
14. А который впервое украдеть, а дотоль будеть не крадывал: ино за первую татбу виною его казнити; а же будеть ниже полтины, домовыи речи крал, домовыми ж речьми платити, а будеть выше полтины крал, хотяб пак первое украл, ино его обесити.
15. А который хотя первое украл, а коньская татба, коня украл, а с лицом приведуть : того узвесити.
16. А коли татя приведуть, а на кого сок усочить, а домучятся татбы , а будеть перво того крадывал и кому плачивал, а околица то будеть ведала: и без лица обесити.
17. А пак ли сок усочить на кого, а лица не будеть, а перво будеть украл, и околица будеть перво злодейства на него не ведала, а будеть никому не плачивал: ино ему платити татбу истьцю и вину; а смертьною раною его не казнити .
18. А коли тать дасться на муку, а зелие знаа, а знатникы будуть добрыи на него, сок усочить, а будеть первей того крадывал, а любо мучиван, а и сьведомо то будеть околици: ино того зелейника хотя недомучается, ино его обесити .
19. А коли чии паробькы украдуть што у кого, а пак у сем листу верху писано, как за которорую татбу казнити: коли первое украдеть, ино его не вешати, а заплатити бондою его, а не будеть бонды, ино осподарь его за него заплатить, а паробка сказнити и пробити; а коли иметь часто красти после того, а выше полукопья, ино паробка узвесити .
А також кому будеть до кого какое дело, будеть земное дело, ино ездокы побрати; а будуть иныи которыи дела, ино судьи побрати, а искати правом; а порубов и наездов не надобе никому же чинити.
21. А которыи бы сами собою порубы делали, а любо наезды чинили: ино кому сталася кривда, тот имаеть ся нам жаловати; а пак ли не пригодиться нас у великом князьстве Литовьском, и он имаеть паном-раде нашей жаловати; и паном воеводом нашим по того послати и велети пред собою моцно поставити, а и досмотрети: будеть ли то так чинил, а всадити его у казнь и держати до нашего щастного приеханиа: бо тот ис права земьского выступил, а над право сягнул, как у верху писано. Мы пак, снемся с паны-радою нашою великого князьства Литовьского, осмотрим того, какою казнью того казнити .
22. А коли бы два мели ся правовать, а возьмуть собе ездокы и судьи: ино учинити им рок, а дати ведомо за чотыри недели, штобы ся оба-два зготовили к тому року перед тыи судьи; судьам же и ездоком там выехати на речное местьцо. А который бы из дву тых сутяжаев не выехал, тот без суда виноват; а который выехал, того оправити в том, чого будеть искати: нижь коли бы пригодилася наша, а любо земьскаа служба , а любо болееть: тым того не истратить .
23. А коли бы кто коня, а любо клячю знашол блудящюю, или иныи которыи речи изнайдеть, ино оповедати околици: не изнайдеть ли ея истець до трех днев, ино повести на королевскый двор, по давному , да переем свой возми; а пак ли который што утаить, а въсхочеть собе покорыстовать, а будеть на то довод: тот такый злодей, как который.
24. А который будеть люди выводити, а любо челядь неволную, а ухватять с лицом: того на шибеницю; а изнайдет ли ся сок, ино тому право: как у сем листу верху писано, по тому его судити .
25. А також, где которыи мосты мощивали за дядю нашего, за великого князя Витовта, и за великого князя Жикгимонта, туть бы и ныне каждый свои мостьници замостили и заделали, как надобе; а што бы не мешкали, сего жь лета уделали. А на чией делници щькода ся станеть, конь ся образить , ногу изломить: тому платити. А пак ли которыи не заделают своих делниць сего лета, а исплошаться: тот ис права выступил; на том нам вины десять рублев.
Протож, как у сем нашом листу выписано, по тому бы есте рядили, а им того не выступали.