«Великий пожар» и восстание в Москве в 1547 г.

«ВЕЛИКИЙ ПОЖАР» И ВОССТАНИЕ В МОСКВЕ В 1547 Г.
О пожаре в граде. Тоя же весны, априля 12 (1547)… загореся в Торгу в Москотинном ряду ; и погореша лавкы в всех рядех града Москвы со многыми товары от Николского хрестьца и до речной стены городной; и гостиные дворы великого князя , и дворы людскыа и животы многые погореша, от Ильинскые улицы и до городные стены, от площадки и до речной стены городной , церкви и монастырь Богоявленьской и Ильиньской. А у реки у Москвы у стрелницы загорешася зелие пушечное и от того розорва стрелницу и размета кирпичие по берегу реки Москвы…
О великом пожаре. Того же месяца 21… в 10 час дни… загореся храм Воздвижение честного креста за Неглимною на Арбатской улице на Острове. И бысть буря велика, и потече огнь, якоже молниа, и пожар силен промче в един час… В един час многое множество народу згореша, 1700 мужеска полу и женьска и младенець… таков пожар не бывал на Москве, как и Москва стала именоватися… прежде бо сего Москва не такова бяше народна, якоже ныне народом умножися в лета благоверного царя и великого князя Ивана Васильевича всея Русии…
Об убиении князя Юрья Глиньского. И после пожару на 2 день приехал царь и великий князь навещати Макария митрополита… и бояре с ним, и вражиим наветом начаша глаголати, яко волхвъванием … вся Москва погоре… И того же месяца 26 день, в неделю, на пятый день после великого пожару, бояре приехаша к Пречистой к соборной на площадь и собраша черных людей и начаша вопрошати: хто зажигал Москву? Они же начаша глаголати, яко княгиня Анна Глинская з своими детми и с людми волховала… и оттого Москва выгорела. И сие глаголаху чернии людие того ради, что в те поры Глинские у государя в приближение и в жалование, а от людей черным людем насилство и грабеж, они же их от того не унимаху… а князь Юрьи Глинской тогда приеха туто же… и пошел в церковь в Пречистую. Бояре же по своей к Глинским недружбе наустиша черни; они же взяша князя Юрия в церкви и убиша его…
Много же и детей боярских незнакомых побиша из Северы, називаючи их Глинского людми. А после того убийства на третий день приходиша многие люди чернь скопом ко государю в Воробьево, глаголюще нелепая, что государь хоронит у себя княгини Анну и князя Михаила и он бы их выдал им. Царь же и великий князь повеле тех людей имати и казнити; они же мнози разбегошася по иным градом, видяще свою вину, яко безумием своим сие сотвориша…