Докончание кн. Ив. Васил. с кн. Фед. Васил., 1496 г

ДОКОНЧАНИЕ ВЕЛИКОГО КНЯЗЯ РЯЗАНСКОГО ИВАНА ВАСИЛЬЕВИЧА С КНЯЗЕМ ФЕДОРОМ ВАСИЛЬЕВИЧЕМ, 19 АВГУСТА 1496 Г.
[Божиею милостию] и Пречистыа Его Богоматери, и по благословенью отца нашего Семиона, владыки Рязанского и Муромского, и по нашей любви, на сем на всем, брате молодшии, князь Феодор Васильевич, целуй ко мне крест, к своему брату старишему, к великому князю Ивану Васильевичу.
[Держати ти меня] себе братом старейшим. А мне, великому князю, держати тобя собе братом молодшим. А меня ти, великого князя, и мое великое княженье держати чесно и грозно, без обиды. А мне, великому князю, тебя держати в братстве, и в любви, [и во чти], без обиды. А хотети ти мне, великому князю, добра везде, во всем и до живота. И быти ти со мною, с великим князем, везде заодин, и до живота, на всякого недруга, и твоим детем с моими Детми. <…> Ачто ти слышев [о моем добре или о ли]се от хрестьянина, или от литвина, или от иноверца, то ти поведати нам в правду, без примышленья. А не канчивати ти, ни ссылатися ни с кем без моего веданья, великого князя. А мне, великому князю, тако жо без тобя не канчи[вати, ни ссылатися ни с кем. А с кем яз, князь] великий, буду в докончаньи, и мне с тем и тобя учинити в докончаньи. А с кем будешь ты в целованьи, и тебе к тому целованье сложити. А хто к тебе учнет присылати на наше лихо, и тебе то нам пове[дати в правду, без хитрости. А того тебе без моего] веданья не отпустити, кого к тебе пришлют. А мне, великому князю, тобя жаловати и печаловати ми ся тобою и твоею отчиною.
А чем тобя благословил отец наш, князь великий Василеи Иванович, да [и яз, князь великий Иван Васильевич], с своею матерью, великою княгинею Анною, отделили асмя тебе в Переаславли Перевитеск и Рязань Старую с волостьми, и с отъеждими месты, и того мне, великому князю, всего под тобою блюсти, и не оби[дети, ни вступатися, ни мо]им детем под твоими детми. А жити ми с тобою в Переслав ли по тому, как отделил тобя яз, князь великий, и мати наша, великаа княгини. А отчина ми твоа держати под тобою, и блюсти, и не оби дети, ни вступатися, ни моим [детем под твоими детми]. А чем меня благословил отец наш, князь великий Василеи Иванович, Переславлем, и Ростиславлем, и Пронском, и всеми волостьми, и со отъеждими месты, и всем великим княженьем, и тебе подо мною великого княженья не хоте[ти, ни твоим детем] под моими детми, ни обид ити, ни вступатися.
А по грехом, отоимет Бог меня, великого князя, и тебе под моими детми великого княженья не хотети, ни твоим детем под моими детми, и блюсти, и не оби дети, [ни вступати]ся. А не будет у меня детей, и мне, великому князю, великим княженьем благословити тобя, своего брата.
А отоимет Бог тобя, нашего брата молодшаго, и мне, великому князю, в твою отчину не вступатися, ни моим детем под твоими детми. А не будет у тобя детей, и тебе, моему брату, своей отчины не отдати никотораю хитростью мимо меня, великого князя .
А что мати наша, великая княгиня Анна, взяла у меня, у великого князя, из моего великого княженья четверть во всем, и то мати наша ведает до живота. А по грехом отоимет Бог матерь нашу, и та четверть моя и есть во всем. А тобе в то не вступатися. А что мати наша взяла у тобя, у моего брата, ис твоей трети четверть, и то мати наша ведает до живота. А [о]тоимет Бог матерь нашу, и та четверть твоя и есть со всем. А мне, великому князю, в то не вступатися.
А Орды знати и ведати мне, великому князю, и царевичев ясак Сатылганров, или хто иной царевич будет на том месте. А имати ми у тобя выход и царевичев ясак, с твоей отчины треть, по старым дефтерем, по крестному целованью. А коли яз, князь великий, в Орду не дам и царевичю ясака, и мне и тобя не взяти.
А где ми, великому князю, самому всести на конь, и тебе со мною пойти. А где ми тобя послати, и тебе пойти без ослушанья . А где пошлю своих воевод, и тебе послати с моими воеводами своего воеводу с людми. А делати ти велети мое дело в правду, без хитрости. А хто учнет тобя, моего брата, обидети, и мне с тобою стояти заодин, в правду.
<…> А мне, великому князю, новых пошлин не замышляти, а тебе, моему брату, в своей отчине новых пошлин не замышляти. А ведати пошлины по старине. А в церковные пошлины нам не вступатися .
<…> [Ав городе] в Переславле быти, брате, твоему третчику с моим наместником з болшим в душегубстве, и в розбои, и в татбе с поличным, и на посаде меж моих людей, и твоих людей, [и межи чьих людей ни буди, ино] пристава даст мои наместник, великого князя. А прилучится твоего третчика пристав туто, и он с ним идет и на поруку даст. А не прилучится, и пристав моего наместника [один идет без твоего третчика пристава], и на поруку даст, и поставит перед моим наместником, и мои наместник судит. А твои третчик прилучится туто, и он с ним же судит, а не прилунится [туто, и мои наместник без него судит один], а твои третчик смотрит своего прибытка. Да и выных делех во всяких на гостей и на черных людей, опричь кладежных людей старых, кои послов кормят в Переславли, [пристава даст и судит мои] наместник, великого князя. А твои третчик при лучится тут, и он своего пристава даст, да и судит с моим наместником, а не прилучится тут, и мои наместник судит без него, а твои третчик [в прибытке и в пошлинах] наместничих ведает свою треть. А коли приедут твои люди из твоего уделу в Переславль, а прилучится у них в Переславли душегубство или розбои, и татба с поличным, и над ними суд в душегубстве и в поличном в Переславли моего наместника и твоего третчика. А без моего наместника пристава твоего третчика в душегубстве и в поличном на поруку не дати. А тобе, моему брату, своих людей в Переславли в душегубстве, и в розбои, и в татбе с поличным самому не судити . А будет каково иное дело меж твоих людей, которые живут в городе в Переславле и на посаде, опричь душегубства, и розбоя, и поличнаго, ино их судит твои приказщик, и доложит тобя, моего брата. А не будет тобя в Переславли, и ему дождати тобя, как будешь в Переславли. А ис Переславля твоему приказщику в твои уде тех людей к тебе к докладу не водити.
А хто приедет в Переславль торгом, да протамжится, или твои человек приедет из твоего уделу в Переславль, да протамжится, ино в протаможьи даст на него пристава мои наместник, да и судит его один без твоего третчика. А кого перед ним в протаможьи утяжут, и он велит таможником взяти на нем протаможья два рубля, а ему взяти от суда четыре алтыны, и те четыре алтыны емлет мои наместник один, а твоему третчику ис тех четырех алтын нет ничего. А тобе, моему брату, в Переславли своих людей в протаможьи не судити, ни твоему третчику.
А мне, великому князю, в душегубстве, и в розбои, и в татбе с поличным, и в протаможьи, и в какове деле ни буди, твоих людей судити и казнити воля во всем. И на ком уроку что яз, князь великий, продажи своему наместнику, и в том уроце твоему третчику треть.
А хто здешний жилец, переславец, городской человек или загородскои, взыщет чего на твоем третчику, или на его тиуне, или на его доводчикех, ино его яз, князь великий, сам сужу, да его тиуна, и его доводчиков.
<…> А хто имет жити твоих бояр, и детей боярских, и слуг в моей отчине, великом княженьи, и мне их блюсти, как и своих. А отчин ми у них и купленых земель не отнимати. А хто имет жити моих бояр, и детей боярских, и слуг в твоей отчине, и тобе их блюсти, как и своих. А отчин ти у них и купленых земель не отнимати. А хто которому князю служит, где бы ни жил, тому с тем и ехати, хто которому служит. А огородная осада, где хто живет, тому туто и сести, опрочь бояр введеных и путников. А бояром, и детем боярским, и слугам и хрестьяном меж нам волным воля .
А сел ти в моей отчине, великом княжении, не купити, ни закладнеи не держати. А мне, великому князю, в твоей отчине сел не купити, ни закладнеи не держати.
А которых дел не искали до нашего докончанье, и тем делам на обе стороны суд. А даному, положеному, холопу, робу от века суд. А татя, беглеца по исправе выдати. А заемному, поручному, и всему обидному меж нас суд без перевода. А судьям нашим третей волной нашей земли.
А пошлин с холопа с семьи два алтына, а с одинца алтын.
А на сем на всем, брате молодшии, князь Феодор Васильевич, целуй ко мне крест, к своему брату старишему, к великому князю Ивану Васильевичю, по любви, в правду, без хитрости.
А писана в Переславле, лета 7004, августа в 19 день.