Катырев-Ростовский И.М. Написание вкратце о царях московских

КАТЫРЕВ-РОСТОВСКИЙ И.М. НАПИСАНИЕ ВКРАТЦЕ О ЦАРЕХ МОСКОВСКИХ
Царь Иван образом нелепым , очи имея серы, нос протягновен и покляп; возрастом велик бяше, сухо тело имея, плещи имея высоки, груди широкы, мыщцы толсты; муж чюднаго разсуждения, в науке книжняго поучения доволен и многоречив зело, ко ополчению дерзостен и за свое отечество стоятелен. На рабы своя от Бога данныя ему жестокосерд велми, на пролитие крови и на убиение дерзостен и неумолим; множество народу от мала до велика при царстве своем погуби, и многия грады своя поплени, и многие святителские чины заточи и смертию немилостивою погуби, и иная многая седея над рабы своими, жен и девиц блудом оскверни. Той же царь Иван многая и благая сотвори, воинство велми любяше и требующая от сокровища своего неоскудно подаваше. Таков бо бе царь Иван.
Царь же Федор возрастом мал бе, образ постничества нося, смирением обложен, о душевней вещи попечение имея, на молитве всегда предстоя и нищим требующая подая; о мирских ни о чем попечение имея, токмо о душевном спасении. От младенства даже и до конца живота своего тако пребысть, за сие же спасенное дело его Бог царство его миром огради, и враги под нозе его покори, и время благоутешно под аде. Таков бе царь Феодор.
Царь же Борис благолепием цветуще и образом своим множество людей превзошед, возрасту посредство имея; муж зело чюден в разсуждении ума доволен и сладкоречив велми, благоверен и нище любив и строителен зело, о державе своей много попечение имея и многое дивное о себе творяще. Едино же имея неисправление и от Бога отлучение: ко врачем сердечное прилежание и ко властолюбию несытное желание; и на прежебыших ему царей ко убиению имея дерзновение, от сего же и возмездие восприят.
Царевич Федор, сын царя Бориса, отроча зело чюдно, благолепием цветуще, яко цвет дивный на селе, от Бога преукрашен, и яко крин в поле цветущи; очи имея велики черны, лице же ему бело, млечною белостию блистаяся, возрастом среду имея, телом изобилен. Научен же бе от отца своего книжному почитанию, во ответех дивен и сладкоречив велми, пустотное же и гнилое слово никогда же из уст его исхождаше, о вере же и о поучении книжном со усердием прилежа.
Царевна же Ксения, дщерь царя Бориса, девица сущи, отроковица чюдного домышления, зелною красотою лепа, бела велми, ягодами румяна, червлена губами, очи имея черны велики, светлостию блистаяся; когда же в жалобе слезы из очию испущаше, тогда наипаче светлостию блистаху зелною, бровми союзна, телом изобилна, млечною белостию облиянна, возрастом ни высока, ни ниска, власы велики имея черны, велики, аки трубы, по плечам лежаху. Во всех женах благочиннейшая и писанию книжному навычна, многим цветяше благоречием воистину во всех делах чредима; гласы воспеваемыя любляше и песни духовныя любезне желаше.
Рострига же возрастом мал, груди имея широкы, мышцы толсты, лице же имея не царсково достояния, препростое обличив имея, и все тело его велми помраченно. Остроумен же, паче и в научении книжном доволен, дерзостен и многоречив зело, конское рыстание любляше на враги своя ополчитель смел, храбрость и силу имея, воинство же велми любяше. Таков бо Рострига.
Царь Василий возрастом мал, образом же нелепым, очи подслепы имея, книжному поучению доволен и в разсуждении ума зело смыслен, скуп велми и неподатлив; ко единым же к тем тщание имея, которые во уши ему ложное на люди шептаху, он же сих веселым лицем восприимаше, и в сладость их послушати желаше, и к волхованию прилежаше, а о всех своих не радяше.
«Повесть сказуема о том прозванном царевиче Дмитрее»
Той же Рострига названный царевичь, приходит к единому порубежному городку от Северских городов, Монастыревской зовомой и посылает писание свое во град, яко он есть царевичь Дмитрей, его же Борис Годунов повеле убити, и милостию же Божиею избыв лен бысть ото убиения, идет доступати отеческого своего престола. Людие же городка того радуютца о том радостию великою зело и приимают его с честию. И оттоле посылает от себя грамоты во град в Чернигов и во град Путивль, во все грады Северскыя страны, яко он есть царевичь Дмитрей, сохранен от смерти, идет на царский престол. Воеводы же черниговскые, яко крепкые поборницы, князь Иван Ондреевич Татев и князь Петр Михайловичь Шеховской, и Путивльскые воеводы, Михайло Михайлович Салтыков да князь Василеи Михайловичь Мосалской, никако того восхотеша прияти и поведают о нем народу, дабы не сумневался о том, яко ложь есть, а не истина: той есть существенной рострига Гришка Отрепьев, а не царевичь Дмитрей, и идет на разорение христианския веры. Народи же градов тех возопиша гласом велиим, да пойманы будут воеводы яко изменницы суть и единогласникы Бориса Годунова: не хотя видети прироженного государя на Московском царствии, поведают нам сия пустошноя словеса! И пойманных воевод и связанных ведут безчестие до нареченнаго царевича и предают ему грады в руце ево, Путивль и Чернигов и ины грады страны Северския. И ту собирает воинство великое Литовского народу и тамо жителствующих Северских людей, и грядет под Северский Новогородок, и тамо ево облягает и утвержаетца обозами, и начинает по городу стреляти и всячески домышленьми досегати, какобы ему град той одолети. В том же граде бысть воеводы от царя Бориса князь Никита Романович Трубецкой да Петр Федоровичь Басманов; той же Петр Басманов многое дивное о себе творяше и град ополчением своим мужески защищаше.
Предреченный же бояре и воеводы к царю Борису, князь Федор Ивановичь Мстиславский и князь Дмитрей Ивановичь Шуйской с товарыщи своими, со многою ратию приидоша под он Новгородок на избавление его и составиша брань велию зело с Ростригою и с воинством его. И брань плит жесточайшая на обе страны, падают трупие мертвых семо и овамо; на конец же той брани, греха ради православного християнства, побежденно быша Московское воинство, уже давшеся бегству. Поляцы же усты меча гонят, в крови християнской руце свои обагриша, и начальника всего Московского воинства, князя Федора Ивановича Мстиславского, поранивше зело, и с коня его низвергоша, и отвезен бысть з бою ранен. И тако плит брань жесточайшая чрез день; уже солнцу уклоншуся на запад и покрыся земля ношною тмою, и тако преста брань. Рострига с воинством поиде на свои станы, а воеводы царя Бориса, отшед от городка якобы едину 10 верст, и тамо шатры поставиша и почиша сном. И от тое брани Рострига возвратися во град Путимль и нача к собе войско Литовское призывати и, собрав войско велие зело, устремися пойти на воевод Московского воинства; началницы же и воеводы всего Московского воинства никако сего ужасошася и повеленное царем Борисом вся исполняют. Поидоша противу Ростриги, и сошедшимся има в месте, глаголемом Чемлиге, и ту составиша брань жесточайшую; блистают сабелныя лучи, аки солнце, падают трупия мертвых семо и овамо, и тако бысть брань велия. Ростригино же войско помалу оскудеваше и вдашася бегству; Московстии же народи поля обретают и усты меча гонят овых же убивают, овых уязвляют, овых низлагают; тако побеждены быша Поляцы.
Рострига же той едва сам от поимания избы, и прибежав до града Путимля, и тамо утвердися с тамо жительствующими народы, а войско же его все разыдошася от тоя брани восвояси. Царевы же воеводы и началницы поидоша со всем воинством под городок Кромы и тамо его облегоша, понеже седоша казацы в нем Ростригины и много пакости творяше царевым людем. Царевы же воеводы стояше под городком три месяца, и брани безчисленны творяше, и ис пушек из великих и из огненных непрестанно стреляху, и городок той запалиша; людие же городка того никако о сем ужасошася, но и паче укрепляхуся и людей царевых безчисленно побиваху.
В то же время, егда стояху людие царевы под Кромами, ополчахуся противу врага царева, случися царю Борису в царствующем граде сидети за столом в царском своем доме, обеднее кушание творяше по обычею царскому; и по отшествии стола того мало времени минувшю, царю же в постелной своей храмине седяшу, и внезапу случися ему смерть и пад издше.<.. .> Царица же Мария с сыном своим царевичем Федором, мало отдохнув от скорби бывшия, и призва к себе патриарха Иова и весь собор и боляр великих, и молиша их, да были не отступили сына их, царевича Федора, и дали бы ему царствовати вместо отца своего. Боляре же и началницы Московского царства, вкупе же и весь народ, обещание даша царице: да служат ей и сыну ея и возведут его на царский престол вместо отца его.<…>
И слышенна бысть смерть царева воеводам и началником и всему воинству, которые пребывают во обступлении града Кром и в защищении от врага царева Гришки Ростриги, и начаша воинстии людие умы своими колебатися семо и овамо и сотвориша совет, да престанут бранная ополчения противу Ростриги, прозванного царевича. Лукавый же бес вложил мысль сию в сердца всем человеком, да мнят вси людие существенно быти царевича Дмитрея оного Ростригу, и восхотеша ему служити, а Борисова сына суще отвергошася. И согласишася все воинство купно, и оружия своя воздвигоша, и на воевод царевых напрасно нападоша, и, поймав, во град в Путивль связанных поведоша до оного мнимого царевича, и завещанием общего совета между собою вси людие утвердишася, да во единой мысли все пребудут. И дошед Путивля града, и пад, поклонишася Ростриге, его же мнят царевичем Дмитреем быти, и предашася в руце его волею, да царствует над ними и надо всею Росиею во веки.<…> Той же Рострига видев Московское воинство покоренно пред собою и воевод и началников преданных в руце его, радостен зело и седе на уготованном месте своем и повеле воевод Московского воинства привести пред лице свое. И излия словеса многия пред ними, и укоры и поносы им глаголаше, понеже противу его ополчахуся, а потом оболстив их словом ласкосердия и повеле служити себе такожде, яко же и царю Борису верно послужиша.<.. .>
Слышано бысть сия во царствующем граде, яко войско все предадеся в руце мнимого царевича и воевод царевых связанных к нему отведоша, а другия до царствующего града утекоша. В то же время прииде вестник от Ростриги во царствующий град Москву, дворянин некий, Гаврило Пушкин имя ему, и дошед до Лобново места, и собра народ весь и проповеда всему миру повеленное Ростригою; яко существенной царевичь Дмитрей избавлен от смерти и от Борисова гонения и идет на царский свой престол мирно. Слышавше то вси людие, и поколебашася умы своими, и сотвориша пустошная и злая, и воздвигоша оружия, приидоша на царский двор и пограбиша царские сокровища; царицу же Марию и сына ее царевича Федора, и дщерь ея, царевну Ксению, ис царсково их дому отведоша бесчестие в прежебывшия их жилища, идеже они пребывали до царсково степени, и тамо их заточиша.<…>
Рострига же той приде во царствующий град, и стретоша его вси людие от мала и до велика и с пречестными и с чюдотворными иконами и со многими дражайшими дары; и радостны бысть вси людие, мняху его суща царевича Дмитрея быти. И седе Рострига на царствующем граде и возложи на ся царский венец… И нача владетелно держати Российское царство и возведе на святительский престол единогласника своего, богомерскаго еретика Греченина Игнатия, а преже бывшего великаго патриарха Иова заточению предаде… Царевну же Ксению, дщерь царя Борисову, девицу сущу, срамотне счиниша над нею и девство ея блудом оскверниша, а потом пострищи ее повеле, и отослаша ея в далнюю пустыню, в горы, на Белоозеро, близ пречистныя обители Кириллова монастыря.