Хроника формирования Нижегородского ополчения 1612 г.

ХРОНИКА ФОРМИРОВАНИЯ НИЖЕГОРОДСКОГО ОПОЛЧЕНИЯ 1612 ГОДА
<…> Посоветовав Московского государства бояря и вся Земля, которые во православии, и даша же смольяном грамоты, и повеле им испоместитися в арзамаских, и в куръмыских, и в алатарских местех. Смольяне же поидоша отто Брянска в арзамаские места.
Пришедшим же им в арзамаские места, арзамасцы же неразумнии тогда явившеся, не разумеша помощи Божия и Московскому государству очищения, Совету всей Земли не послушаша и смольяном кормов и запасов дати не восхотеша, и начаша противитися, и не возмогоша. Тогда арзамасцы безумен совет сотвориша и к смольяном на бой поидоша, восхотеша противни им быти и смольян озлобити.
Смольяне же, видев их многое безумие и непокорение, и абие напрасно скочиша на нь. Они же, яко скот от дикиих зверей, разбегошася и падоша, сами бо себе своим непокорством пакость учиниша, и мнози от них побиты быша.
Смольяне же за их непокорство их побили, и два острожка у них взяли, и мелними запасы наполнилися. Арзамасцы же, разумевше свое безумие и непокорство, в велицей своей беде кающеся, возопиша, рекуще: «О, горе нам, братие. Лучше было нам есть смольян господи имети и целым быти, и пред ними покорным быти, и своею волею запасы и оброки им давати, нежели ныне в велицей беде побитым, и богатство своего напрасно лишитися, и неволею животов своих остати». Тогда бо сами о своем безумии после размыслиша и много потужиша.
Бысть же 120 (1612) году в Нижнем Нове граде некий муж благолюбив и добросмыслен зело, именем Козма Минин, от посацкого чина земским старейшиинством почтен бысть в Нижнем граде. Той бо Козма, издавна слышав про храбрость смоленскую и про мужество дворян града Смоленска, колики помощи Московскому государству учиниша, государю верно послужиша, и многи грады побраша, и велию храбрость и радение показаша, за православную христианскую веру много постояша и многих противных полки побиша, и во всем непоколебимы, и помощию всесильного Бога вооружении, и храбри быша.
Слышав же, яко смольяне в Арзамасе, близ Нижнева Нова града, и многою радастию возрадовася. Созвав же всех нижегородцев и нача доброумными своими словесы глаголати к ним, рекуще: «О, братие и друзи, вси нижегородстии народы! Что сотворим ныне, видяще Московское государство в велицем разорении? Откуду себе чаем помощи и заступления граду нашему, разве милости Божий? Видехом, братие, многих градов Российского государства разорение и православных христиан побиение, и жен их и чад в плен ведение, и всего богатства их лишение. И совет даю вам, братия моя, аще словес моих и послушаете: да призовем себе в Нижнем Нове граде храбрых и мужественных воин Московского государства, достоверных дворян града Смоленска, ныне бо они близ града нашего, в арзамастех местех. Лутче бо есть нам имения своя им отдать, а самим от иноверных поругания свободным быти, и в вере правой жити, и единоверным работати, и оброки давати, нежели от иноверных наития и разорения на себе ждати, и себе, и жены, и детей своих в вел идей беде, и в плене, и поругании видети, и животов своих неволею отстати. Се же, братие, разделим на три части имения своя: две убо христолюбивому воинству, себе же едину часть на потребу оставим».
Людие же Нижнева Нова града вси похвалиша доброй его совет и поединогласно глаголюще: «И добро есть нам тако сотворити, единоверных призывати, нежели от иноверных наития в разорении быти». И послаша к смольяном из Нижнего Нова града в Арзамас с великою честию, и начаша призывати их, дабы шли в Нижней Нов град, и обеща им дати денежные оброки, кормовые запасы, еже есть годно им на их потребу.
Смольяне же, послушавше Козмина доброприветнаго совета, из Арзамаса в Нижней Нов град приидоша генваря в 6 день, на праздник Богоявления Господня.
Козма же Минин, учинив встречу смольяном со многою честию – честными иконами и со всем собором Нижнева Нова града, со всеми народы выхождаху из града на встретение их и со многою радостию и со слезами рекуще: «Се ныне, братие, грядет к нам христолюбивое воинство града Смоленска на утешение граду нашему и на очищение Московскому государству».
И сретоша их с великою честию и со многою радостию. Доброприветный же Козма добрыми, добросмысленными своими словесы похвалив Бога и Пречистую Его Матерь и всех святых Его, видяще велию помощь Божию о пришествии смоленских вой, многою радостию возрадовашася, и много доброприветных к ним словес изрече, похваляюще их храбростию и мужеством, и ратное стройство, и многое их радение о очищении Московского государства, и крепкое, непоколебимое их строение за православную христианскую веру.
Они же, видев его добросмысленнаго, и о православной вере ревнителя, и Московского государства о очищении велие попечение имуща, почтиша же и его многою честию, и многою радостию возрадовашеся о таковем добросмыс ленном мужи. Пришедшим же им во град и сташа по его доброрассудному расказанию.
Бысть же в Нижнем Нове граде о пришествии смоленского воинства радость велия. Той же добролюбный муж Козма Минин прежде всех разделив имение свое на три части, и взяв две части имения своего, и со многою радостию принес на собрание казны ратным людем, себе же на потребу едину часть имения своего остави. Потом же и вси граждане такоже сотвориша: две части имения своего в казну принесоша, третию же часть имения на потребу себе оставиша.
И собрав казны множество, той благоразсудный Козма, разобрав же дворян града Смоленска против их дворянския чести на три статьи, учинив первую статью, и середнюю, и меншую, и вместо государева жалованья даде им полныя оброки против их дворянской чести. Прежде всем равно даде им по 15 рублев, потом же даде им по статьям: первой статье по 30 рублев, средней же статье по 20 рублев, меньшей же статье по 15 рублев.
Потом же смольяне и нижегородцы, увидевше, что князь Дмитрей Михайлович Пожарской в вотчине своей, в Нижегородцам уезде живяше, и послаша к нему Нижнего выборных людей просити, чтоб был он в Нижнем у всей рати воеводою. В то время князь Дмитрей Михайлович Пожарской был ранен и от раны много скорбяше. Приидоша же к нему выборныя люди и молиша его, дабы шел в Нижней Нов град. Он же от великия своея скорби и от раны ходити не можаше, слышав же о смолья нех, яко приидоша в Нижней Нов град, не презре моления их и поиде, от раны скорбен, в Нижней Нов град.
Пришедшу же ему в Нижней, и возрадовася вся рать о пришествии его, и нарекоша его у всей рати воеводою. И абие князь Дмитрей Михайлович Пожарской с Козмою Мининым и смольяны и со всеми ратными людми велие попечение имеюще о очищении Московского государства.
Тогда же изо всех градов ратныя люди начаша к нему съезжатися, видяще их доброе стройство к ратным людем. И собрашася многи полки, хотяше бо итти к царствующему граду Москве, и писаша грамоты из Нижнего Нова града от всей Земли по градом и по болшим селам, чтобы ратным людем на станех готовили запасы и кормы, чтобы никакие скудости не было.
Поидоша же из Нижнего Нова града князь Дмитрей Михайлович Пожарской с Козмою Мининым и смольяны, с ратными людми и с ыными городы со многими полки. Шедшим же им по станом, везде же кормы им и запасы готовы бяху, ратныя же люди никоей скудости имеюще.
Пришедшим же им на Балахну, тогда же Козма Минин многим своим радением к ратным людем повеле всех посацких людей собрати и повеле им по нижегородцкому уставу две части имения своего в казну ратным людем отдати, себе же на потребу третью часть имения оставити. Они же вси по его уставу тако имения своя в казну приношаху. Которыя же восхотеша утаити имения своя, и принесоша не противу его окладу, и скудни называющеся. Он же видев их пронырство и о имении их попечения, повелевая им руце отсещи. Они же не восхотеша в велицей скорби быти, наипаче принесоша по его окладу.
Собрав же на Балахне казну и поидоша со станом, Яков же указ писаше от всея Земли, они же по указу везде кормы и запасы по станом ратным людем готовяще.<…>