1655, ноябрь. Универсал Б. Хмельницкого

Богдан Хмелницкий, гетман, з войском Его Царского Величества.
Паном полковником, асаулом, сотником, атаманом и всему товариству войска Его Царского Величества Запорозкому, старшине и черни, в тягненю за войском идучим, яко и з войска назад поворачаючим, конъним и пешим, и на якой колвек услузе нашой будучим, вшелякое кондыци и людем и каждому, кому бы сие наше писание показано было, доносим до ведомости, иж непоеднокрот од майстрату киевского доходит до нас скарга, же так од посланцов наших, яко и од инших розных наездов, великие пренагабанъе и докуки поносят, чого мы, болш не хотячи слухати оный маестрат киевский и всех месчан тамошних, пры ласцы нашой заховавши, од вшеляких непотребных датков и даваня подвод уволняем, сурово напоминаньи, абы се жаден з Козаков товариста нашого и вшелякое кондиции людей, за оказанем сего листу нашого, на помененъных (мещанах) а ни подвод, а ни чобот и панчос и инших вымыслов вытягати не важил, и хочай бы хто и з листом нашим на якой колвек послузе нашой войсковой мел се знайдовати, теды и тот ничого вымышляти и подвод жадных вытягати у помененых (мещан) не мают, одно того пильновати, счо бы му в листе нашом было доложено кгде инъде выехавши, с Киева на своих конях, подвод упоминати се; кгды того потреба была; которые бы, без писана нашого, з перначами наехавъши вымыслы якие починити мели и тому суровому писаню вашему были спротивъными, теды мы кождого такового, яко своеволника, тому ж майстратови киевскому, и до нас не отсылаючи, срокго карати позволяем, чего особливе пан полковник наш киевский ностерегати мает, якобы оным ни од кого найменьшая кривда не деялася, иначей не чинячи. Дат. в Паволочи, новембра 26, року 1655.
(Последний документ особенно важен по своему почерку; нам кажется, что он от начала до конца писан собственноручно гетманом, судя по твердости пера, одинаковости чернил и начертанию многих отдельных букв; написан он школьным киевским почерком и ясно доказывает, что Хмельницкий был воспитанником киево-могилянской коллегии, как свидетельствуют об этом даже польские историки.).

Богдан Хмелницкий,
рука власна. (М. П.)