Киевская летопись (1241-1621)

КИЕВСКАЯ ЛЕТОПИСЬ (1241-1621).
Кройника о разных речах – тут найдешь чого потреба.
Року 1241 татаре Подоле и Русь сплендровавши, ко Судомиру и Завифосту пришли и спалили; кроль Болеслав, реченный Пудикус, с Кракова до Угор утек, а татарове, на день пасхи пришедши, Краков спалили и до Сленска пришли, а под Врославлем вернулися, а другие великую Полщу воевали. А так Гендрик Пиус у Лекгници, люду нешто забравши, с татарами зразился, немало их погромил. В той час татарин указался ис чарами, кгдыж на корогви была написана литера якаясь, а на верху голова чловечая з долгою бородою, которой з уст дым шкаредный и смродливый выходил на наших; зачим наши, здумевшись, ослабели, а татаре моц взяли и на голову наших побили; а для личбы у каждого трупа одно ухо отрезовали, и так десять мехов ушю нарезали.
Року 1248 все духовенство ляхов поступили своему папежу на три лета пятую часть своих доходов, абы им посту великого уменшил на две недели, бо его было девять надто на тот час.
Року 1264 быдло великое и малое здыхало у Полщи.
Року 1386 Якгайло, Виленский князь, на королевство полское обран, тогож часу и крещен и назван был Владислав.
Року 1393 Витовт, кнежа Литовское, Орши и Витебска на Белой Руси добыл и пустившись у Киев и Житомир и Звинигород, взял под князем Володимером.
Року 1394. Баязит , цесар турецкий, от Тамерляна, хана татарского, был пойманый и в клетце замкненый и завжды был вожон, аж косткою рыбею сам задавился, абы соромоты ушел.
Того-же часу Витовт, князь литовский, стершись с татары и килконадцать гухвов татарских уворвавши, поймал и привел их у Литву и около Вилни над рекою Вакою осадил, где и тепер мешвают.
Року 1430 Витовт умер.
Року 1439 был Флоренский собор в Венеции.
Року 1440 вымышлено изрядное художество: книг друковане.
Року 1444. Владислав III млад на кролевство был взят Угорское; он турки колко раз громил и был присягл с турками не воеватися, але папеж Евгений его през кардинала разрешив от присяги и на остаток у Варни звытязство одержал, кгды неопатрно турки угонял, и самого там забито, там и поховано.
Року 1451 Царогород и Кгрецию турци взяли.
Року 1476 Новгород великий взял князь Московский за Казимера короля.
Року 1486 Кнежата Северские передались на Москву.
Року 1497 Волохове на Кузьмином лесе поляков буковиною много зрадливе поразили, а сам кроль полский ледве утек. Тогож року князь Александер Браславль заложил.
Року 1507 князь Глинский у Клецку татар побил.
Року 1508. Глинский Заберезинского стял и втек на Москву.
Року 1509 Псков князь Московсвий взял. – Князь Констентин на Кропивне реце Москву побил 80 тисечей на день Рожества Пресвятые Богородицы и церков там казал поставити.
Року 1512. Наши на Лопушном татар побили.
Року 1514. Жикгимонт кроль Польский, не малое войско выправивши так з Литвы, як и з Полщи, до Вифлянт [75] послал и оных ку собе зголдосал; и тепер под послушенством кроля Полского суть. – Тогож року великий князь Московский Смоленск облег и 12 недель добывал, з дел стрелял, которых мел около трех сот; и взял Смоленск. Того-же року наши побили Москву на Орши.
Року 1516. У Полщи и у великом князьстве Литовском лютарня почалась, которая и теперь тривает. Того-же року наши под Опочкою побиты.
Року 1519 Татаре с поляками зрадившеся, на голову наших под Сокалем поразили, а других в Бугу потопили.
Року 1520 Августа король Польский родился и был коронован на кролевство року 1530 и, много речей добрых постановивши, в покою кролевство рядил и в Кнышине живота доконал року 1572 Июля 4 дня.
Року 1526 Князь Констянтин из иншими панами литовскими побил татар за Киевом на Олшаницы реце 80 тисечей.
Року 1531. Волохи у Обертиня побиты.
Року 1535. Наши Стародуб взяли.
Року 1536. Кокошая война была, а ничого не справили нигде.
Року 1542. Была саранча великая.
Року 1543. Было на небеси знамение: двое сонца, двое месяца.
Року 1548. Кроль старый умер.
Року 1549. Передмирку татаре взяли.
Року 1550. Брацлавль татаре взяли.
Року 1563. Князь Московский Полоцко взял.
Року 1564. Битва Ульская была; наши Москву побили.
Року 1569. За короля Августа был такий голод великий, аж люди з голоду мерли, а звлаща в Литве и на Полесю, а на Москве еще больший был; в Литве солянка жита по две копы и по двадцати грошей литовских была. Был тот голод 6 лет поспол, окончился року 1576.
Року 1570. Мороз жито поморозил в самые цветы и был голод великий.
Року 1571. В лете был такий мороз три дни, же все збоже озимое и ярину побил; аж потом отросли потроше и отишли, але велми плохи, так, же в мацу олыцкую по шесть, и по семи коп жита молочено. На другое лето по том голоде был мор великий на Волыне, на Подоли и в Литве, и мало не всюды.
Року 1572. Август король умер.
Року 1573. Гендрик француз коронован у Кракове.
Року 1574. Гендрик зехал с королевства.
Року 1575. Елекция была у Стенжици. Татаре о святой Покрове Подоле и Волынь по самый Илвов и Сокал велми звоевали, иж вся Полща боялась.
Року 1576. Стефан, воевода Седмикгродский, на кролевство Полское взят и коронован.
Року 1577. Татаре Дубна добывали. Наши Кгданска добывали; видячи кгданщане, иж не оборонитись, доброволне поддались – в кголд стародавный знову поступили. Острополь заложен.
Року 1578. Татаре Острога добывали – царь Перекопский с царевичи. Подкова, воевода Волошский, доросши лет своих, низовых козаков набравши, Петрыла воеводу Волошского зогнал, а сам на воеводстве осел, за што король у Лвове казал его стяти.
Року 1579. Полоцко взял Стефан король с поляки, и з Литвою. Того-же року шел дождь все лето без престани.
Року 1580. Луки Великие наши взяли.
Року 1581. Пскова паши добывали и, не вземши, поеднались.
Року 1582. Папеж рымский свята от греков отделил, в чом великое замешане поляков з Русью учинил.
Року 1585. Великая зима и весна сухая, лето не рожайное. Тогож року Белз погорел в мясопуст великий. Тогож року князь Василий Острожский, воевода Киевский, Ярославль заложил.
Року 1586. Князь Александр Констентинович, сын воеводы Киевского, заложил место и замок Браславль.
Року 1588. Максимилиан, цесар христианский, под Краков з великим людом притягнул был, хотечи королем Полским быти; а коли от Кракова оттягнул, под Бычиною поткнулся был и три лета у везеню седел. Тогож року и часу Жикгимонта швецкого на королевство полское обрано и короновано.
Року 1589. Татаре сиаские (sic) под Збаражем кошем стояли и Струса под Баворовом забили. Тогдыж князь Констянтин Василей, воевода Киевский, заложил место Переясловле на старом селищи.
Року 1591. Голод великий был на Подоли и в Руси: по шесть золотых был корец жита.
Року 1592. Козаки Переясловле спалили.
Року 1593. Князь Василей под Пяткою козаков побил и присягли ему козаки, же вечными часы з ним не валчить; и на знак того звитязства казал накидать три ямы великих и казал насыпати над ними три курганы великих, которые и тепер стоят.
Року 1595. Татаре, Подгоре и Покуте звоевавши, через Бескид до Угор пошли.
Року 1595. Канцлер коронный из жолнерами полскими, до Волох утягнувши, волохов под кроля полского подвернул и Веремия воеводу у них осадил.
*Року 1596. Была табурщина на козаки за Переяславлем о семой суботе. Пан Жолковский был гетманом полным; взял тогда Наливайка, славного козака и рицера, которого у Варшаве кроль казал на медянуй кобыле возити. Тогды конец стал Наливайковой таборщины.
Року 1598. Штось было домы, костелы, вежи, церкви попереписовало (sic) над домнимание полское. Тогож року быдло здыхало по Подолю и у Руси.
Року 1599 и 1600 быдло на голову здыхало.
Року 1600. Поляци з Мигалем у Волосех потребу мели и потом, поправшисе, Мигаля прогнали и землю Мултянскую под себе подбили.
Року 1603. Ишла саранча месяца Августа 16.
Року 1604. При великом короли Жикгимонте, а при воеводе Киивском, князи Василии Острозском оказался якийсь цар; першей был в Печерском монастыри чернцом, полрока нихто его не знал, а пришол з Волыни, не знать откуль; потом пошол до князя Адама Вишневецкого, до Брягиня, тамже скидал платие чернецкое; князь Адам оздобил его по царску уборами и прославил его царем Московским и удал его до кроля. Кроль, му додавши веры, пустил его на Москву и при нем пустил воеводу Сандомирского и пана Ратомского, старосту Острицкого, и иных панов много. Который ишол гойне, яко цар; приставало до него панства много. Пришол до Киева октебрия 7 дня, был в Киеви две недели, стоял у Олехновича бурмистра, пошол на Вышегород и шол до Путивля. Вышол с Путивля мая третего 1605 року. Тогож року сел на царстве и коронован заразом, а за якимсь забуренем забыто его року 1606, мая 9 дня.
Року 1608 месеца Февраля 13 дня преставися благоверный и христолюбивый князь Василий Острожский, воевода Киевский, которий насеял рускую землю книгами святыми веры православной; мел и друкарню у Осгрозе и школы философския языком греческим, и латинским, и словенским. Которого тело положено у Острозе, в церкви святого Богоявления. Жил на свете лет 82.
Року 1609. Пан Жолковский, гетман великий, наехал на воеводство Киевское. Тогож року и церков Святой Софии отстала от службы; не почали священники до ней со кресты ходити и службы Божеи отправовати, прето, иж митрополит Инатий пристал до костела римского и приказал был там священником киевским за себе Бога просити; але не получил того, хотяж зажили працы и кошту до двору королевского; за шчо теж и он сам от Бога был навежен злою хоробою и зле живота доконал у Володимери. Позвал попов мандатом на трибунал, да сам и справ своих не попирал. А пред ним был митрополит Михайло Рогоза; той был началнив той болести ; найпервей прислал тут до Киева врядника своего, именем Ян Хрушинский – щырый лях, чого перед тым николи не бывало, которий хотел попов судити и задавал трудности попам о послушенство. Теды и того явне Бог скарал: гды жена его сытила мед к Рожеству Пресвятой Багородици, хотела мети попов в себе на обеде ведлуг давного звычаю и мела сполечность показувать костела римского ис церковю восточною, але не допустил котел:
Пришла до него сыты гледети,
Але мусила в нем и долго сидети,
Аж и очи ей не стали гледети.
Бо и сама скипела.
Так и той дал покой.
Року 1610 знову одозвався тотже Дмитр Иванович царь Московский, скуривши войска полского, которое зобрано было на рокош против его кролевское милости теперешнего Жикгимонта третего, вторгнул до земли Московское под Новагород, маючи поляков тисячей десять, над которым войском полским был старшим гетманом пан Меховицкий; потом Шуйский, царь Московский, зо всего панства своего скупил люду военного напротивко царя Дмитра Ивановича тисячей 180, при котором войску был старшим брат царя Шуйского; а при цару теж Дмитру по пану Меховицком был гетманом князь Роман Ружинский. На тот час войска нашого: поляков и козаков запорозских так теж и донцов всего было тисячей пятнадцать. Спотвал се князь Ружинский з братом царя Шуйского под местом Болховом и поражена ест москва през поляков, козаков и донцов, где воевода Болховский сам и з местом и з замком цареви Дмитру поддалсе; царя Ивана Шуйского брат з остатком войска своего вшол под столицу и положилсе з войском от столици полмили над речкою Ходынкою, а цар Дмитр с князем Ружинским, притягнувши на реку Москву под Тушин з войском, от столици миль полторы; тамже в ночи князь Ружинский с поляками з розных сторон ударили на табор Шуйского и розгромил табор, здобыч немалую одержал, хоч троха с столици москву посилковано, але цар Шуйский болей табором не стал, замкнувшисе з людом до столици и болей в поле битвы не хтел чинити; зачим поляки под моц все царство Московское, окром столици и места Смоленского, все опановали и мели то в моци своей лет три; потом Шуйский, бачечи иж с царства Московского отпору поляком дати не мог, выправил Скопина, давши му килка сот рублей, до великого Новагорода, а оттуль до Немец, затегаючи немцов; где затегнул войска немецкого пехоты и езды тисячей десять. В том же часе его кролевская милость, теперешний Жикгимонт третий Смоленского замку добыл и войско Скопиново знес; жолнером теж, которые цару Дмитру служили, заслуженое поднялсе платити, якож за конфедарациею от жолнеров заслуженое жолнером дошло. Цар Дмитр, видечи, же его войско полское отступило, в малом войску з донцами до Калуги з Заруцким от столицы одышол; тамже сын царя Касимовского, татарин, в поли, мстечисе забитя отца своего, оного царя Дмитра забил; потом Заруцкий царевую Дмитрову за себе взял с потомком, сыном царя Дмитра. Потом Москва оного Заруцкого добыла и на косы в яму живого вкинула, а сына царя на шолковом шнуре обвесили; самую теж царевую до монастыра Покровы Пресветои Богородицы в месте Суздалю постригли. А с королем его милостю Жикгимонтом третим примире учинили на четырнадцать лет, поступивши князство Смоленское и Черниговское зо всими местами приналежными, в року идучом, тисеча шест сот двадцатом. О чом ширей о войце Московской, которая тривала в земли той мало не двадцать лет, чительник найде у кронице полской, которая в рихлом часе выдана будет. Отсылаю, а чогом был от лет трох у той земли сведом, том коротко написал.
Року 1611 месеца Июля 3 дня кроль Жикгимонт взял Смоленск з недели на понеделок.
Року 1612, месеца апреля 19 дня, на паметь преподобного отца нашего Иоана ветхия лавры освещенна бысть церковь светого Спаса , а светого Петра и светого Николы у манастыри Межигорском при игумене Афанасии архиепископом з Кгрецеи; и много народу было з места Киева и з иных мест. Тогож року и тогож месеца 23 дня на день светого великомученика Георгия той же архиепископ осветил церковь светои Троици, в ней же придел светого Кирилла при игумене отцу Василии Красовском, прозываемом Чернобровце.
Року 1613 месяца ноября 3 дня на память святых мученик Акиниксимы и презвитера Иосифа гром гремев и дождь был сильный и з великим страхом на 16 године.
О церкви Соборной мурованой, иже в Киеве стоит на Подоле, як поправлена на старом фундаменте.
Первого початку старого нигде у кройниках не обретохом, токмо сей антиминс на томже престоле старом, сице подписаный: «Осветися алтарь Великого Бога и Спаса нашего Исуса Христа, Пресвятыя Богородицы честного Ея Успения преосвященным архиепископом и митрополитом Киевским и всея Руси Мисаилом, при великом короли Казимери; и положен бысть зде в лето 6901, индикта 6, марта 20 дня, на паметь преподобного отца нашего, Исака Лествичника».
О поправе на старом фундаменте: Из обычнего всемогущого милосердия Спасителя нашего Бога, найпаче же ныне за наших роков посети нас благостию своею, аще и мало что от наших исправлений; но помощ и молитвы святых древних Богоносных отец о нас дествоваша ко Богу, и наше прошение не бысть тощно. За фортунного панованя наяснейшого господаря, пана нашого, великого короля Жикгимонта, а за держание воеводства Киевского велможного его милости пана Станислава Жолковского, а во отступлении митрополитов Киевских вдовствующи митрополии Киевской, понеже они в то время вси уклонишася во купе ко западу; мыж, оных мерзость возненавидевше, наслажаемся пророческих словес, глаголющих: «От Сиона изыде закон и слово Господне, из Ерусалима, а не з Рима»! В то же время в освещенных кир патриарха Констентенополского Тимофея, а зде, во Богоспасаемом граде Киеве, всих обще живущих православных христиан, сынов святыя восточныя церкви, присных во вере, наипаче же пана войта Деонисия Балыки, а по нем наставлшего войта, пана Федора Ходыки, а за бурмистра пана Созона, сына тогож войта Балыки.
Року 1613, месяца апреля 15 дня, на паметь святых апостол: Трофима Пуда, Аристарха, за привилием наяснейшого господаря нашого, великого короля Жикгимонта, а за благословением вышмененного патриархи Тимофея, почали с фундаменту поправлять церков Пресветои Пречистое Успения соборную, стоячую в рынку месте Киевском, внутри и з надворя, бо ошарпалася была велми и розвалялась: верху всего не было. Старый мур по вышние окна збивши, весь верх на ново змуровали: самую баню и тые четыре бани около неи знову робили; бо прежде тых малых бань не было, толко было дошчками покрыто. А поправлял тую церков майстр зе Влох, Савостиян Брач. Почали месяца мая 13 дня; на Возносение Господне выношено все ис церкви и вси обрады церковные: почали ис середины робити зысподу и заробили болшую баню месяца сентебря 4 дня на паметь светого мученика Вавилы; тогож месяца 21 дня у вовторок поставили и крест на церкви, тойже таки, што и прежде был, але позлотили знову; месяца октебря 1 дня домуровали и остатней бани на рогу от урмянское церкви. Тогож року декабря 5 дня на паметь преподобного отца Савы почали служити всенощное и службу Божию и служили през всю зиму, же нелзе было зимою робити майстром аж до недели мироносиц; и опять вси обрады были выношены до Воскресения Христова з церкви, и през тое лето робили, и доробили за помочю Божиею месяца августа 14 дня, и образы постановили, и почали служити аж и до днесь. Обретохом в кройнице, иж первей того сия божественная церков была изнищона и ободрана, все побрано: сребро и злато, кресты и иконы полуплены и попалено все от поганого царя Перекопского Мендикгирия и от нечестивых его агарян. А был приставом и дозорцою до той работы пан Сызон Балыка, упрошоный от всего места. Да не возми нихто сих слов ложю, но веруй, истина бо есть все; и аз недостойный во иереох, Кирило Иванович, на тот час будучи мне уставником при тои церкви, огледах все очима своими, написах достоверно. А сама церков увышки от земли до самого верху болшей бани 30 локоть и 3 локтя и чверть локтя.
А в то время в том же богоспасаемом граде Киеве быша служители священницы светых церквей: Василей Матеребозский, Мина Притисский, Иоан Воскресенский, Никита Спасский, Климентей Наберезский, Михайло Борисоглебский, Климентей Рожественский, Матфей Доброниколский и диякон Демян. А вси тые вышей мененые свещенники, каждый неделю свою служили в тои церкви соборнои светои Пречистое, за господаря короля Господа Бога просили и за пана воеводу Киевского и за ктиторов и за всих православных християн; а оны за тое от господаря короля и от пана воеводы Киевского и наместников его тым были пожалованы тогда и в потомные часы, жебы от мятежных и бурливых на церков Божию еретиков во вшеляком покою на тотчас мешкали, и от вшеляких подачок, и от наездов, и станций околичных, и войск, и от самого пана воеводы жебы были волны.
Року 1614 месяца февраля 26 дня ис четверга на пятницу на паметь светого отца Василия преставися той чесный отец игумен Василей Чернобровка, а погребли его марта во третий день на сырной недели и положили тело его честное под муром, подле правого крилоса, под стеною, со честию великою.
Року 1615 месяца июня 14 дня ис середы на четверг у Печерском монастыри у церкви зостался злодей, хотячи окрасти церков, а коли, у в олтари скрывся, взял из жертвенника сребряный котелец и иные сосуды побрал, и за пазуху заклал, и пошол з олтаря до образа Пресвятои Богородицы, хотячи оборвати килко чирвоных было там на образе, але неякая божественная невидимая сила возбрани ему, килко раз ударило его о землю от образа, елико хотел, паки его било; и так, ушедши у в олтар и оцепеневши, лежал под пекелком, где огонь держат, аж его пономар на заутрей там нашел, и так оный злочестивый все исповедал, што ся над ним чинило.
Року 1617 при великом короли Жикгимонте, а при пану воеводе Киевском, Станиславу Жолковском, старанием и накладом панов мещан Киевских: на тот час пана войта Федора Ходыки и пана бурмистра Матфея Мачохи и всего посполства места Киевского, скопали гору Уздыхалницу, которая стоит пред замком Киевским, и еще знать; а скопано ей полшеста сажня добрых у звышки и нашли там печерку сажней трех у гору глубоко а в шир сажня; и нашли в ней горщик ни щим а большей ничого, и написано на стене имя: «Павел»: знать же то колись , был пустелник.
*Року 1618 месеца февраля 15 козаки запорожские на Зверинци официала митрополичего, а по нашему протопопу, который был послан от митрополита Ипатия Потея до Киева на протопопство, Антония Грековича, родом з Рогатына, который пристал до римского костела и хотел увязатися у монастыр святого Михайла Золотоверхого, поймавши козаки тамже, против Выдубицкого под люд подсадили воды пити.
*Року 1620 Подкало носчате от неприятелей наших панов коронных у земле Волоской, межи которыми было: пайпервей пан Жолковский, гетман коронный, которого поймайвши татарове, голову его оттяли и на взгарду нашим панам сын его власный пред войском татарским на копии носил; а потом послали до свого царя голову оную. Тамже поймали живых: князя Корецкого и пана Струса и иных панов зацных не мало и поведено их в землю Турецкую.
*Тоиж осени, октеврия 29 дня, 18 годины дня было трясение земле на еден час.
*Тогож року, месеца ноембрия 5 дня у Варшаве на сейму, у костеле якийсь пан Пекарский ударил короля Жикгимонта наджаком у лоб, але похибил трохи, подобно з страху, еднак плазом по щоце ударил, иж кроль упал з того пуду; зараз кролевич Владислав припал и оного зрайцу туж, в костеле, шаблею поранил, але не дано ему забити оного.
В лето 7128, а от Рождества Христова 1620, месеца марта в 22 день приехал з Москвы из самой столицы святейший патриарх Иерусалимский, именем Феофан, до Киева и стал у монастыре Братском и был принятый з великою честию от духовных и от свецких людей; на другий день приходил до соборной церкви Успения пресвятой Богородицы. Месеца Априля в 9 день служил службу Божию в церкви соборной и с ним протосиггел патриарха Константинопольского и священники Киевскии значное отправовали набоженство; и был у Киеве през час немалый, през все лето, а с Киева выехал до Трехтемирова до монастыра козацкого, и там был час не малый. Потом провадили его козаки до земле Волоскои и там отдали его господару Волоскому Александру. В том же року, месеца септеврия 3 дня, отежчаючи с Киева святейший патриарх, положил клятву на Рудского, митрополита Киевского, который был под унего костела римского, а вместо его поставил и посветил на митрополию Киевскую человека годнаго и честного, именем Иова Борецкого, у письме словенском, и кгрецком, и латинском ученого и з ним чотырох епископов на рознии места: Мелетия Смотрицкаго на епископство Полоцкое, Исаю Копинского, инока святобливого монастыря Печерского, на епископство Перемыслское, Паисия Ипполитовича па епископство Холмское и Белзское, Иосифа Курцовича на епископство Володимерское.
*Року 1621, генваря 13, 8 годины дня перед вечером указалося на небеси знамение: на полуденной стороне три слонци и три дузе кривавых: одна рогами на севере, другая на полудень. Знать то войну и кровопролитие значило.
Коротко теж напишу, што се деяло за веку мого.
Року прошлого 1618, месеца листопада, з дня на ночь тридцатого, указалосе дивное видение на небе, которое кометою албо звездою злучою зовуть; кгды такая звезда была в року 1500 видена, стало се през мор в Немцах гнев Божий неслыханый, же товар и люди повстрием были караны. Ведомо тож то всим с писма кроничного, што року тисеча пятсот семдесят семого сталосе по такой звезде? якое крови розляние, якое было великое людей мордование праве в тот час в царстве Московском? Одно Бог ведает як много войною през меч и огонь людей погинуло; не один там город, место, поле кровию сплынуло; о Полщи нижей напишу, як се по той комете стало; читай теж писмо светое, найдеш там розумом своим справы, которые заховал Господ Бог верным своим. Юж у крониках полских, русских читаем, же ледве з матки своее дитя на евет отворило ворота з живота, «татарове едут» закричало; и также правдою тогож року стало, же по всей Полщи землю спустошили вшир и надолж и назад вцале вернули. В останку вечная мудрость нехай о нас радит, а штом тут написал, верь ми, же не завадит.
В року 1620, мая 13 дня, светейший патриарх Ерусалимский, кир Феофан, через землю Московскую до Киева прибыл. Для певное ведомости и копию з листу, от короля его мнлости до превелебного отца патриархи Ерусалимского писаного, который на езык руский переложеный так се в себе мает: «Жикгимонт третий, Божию милостию кроль Полский, великий князь Литовский, Руский, Пруский, Мазовецкий и далей. Велебный, побожне нам милый! Пред килка месецей далисмы лист наш до велебности вашои, през который охотне жаданю велебности вашои зложилисми и для тое самое причины коморника нашого, абы велебность ваша тым безпечней през кролевства нашого панства пожаданый преезд одержал; а мы напротив посполитого однак того всего хрестиянства неприятеля, жебы се з звитезства не надымал, такое войско збираем, которым бы за помочю Божю наездом его отпор учивити се мог; якож и тепер зараз войску нашому Запорозскому напротив посполитого того неприятеля, яко наскорей, выходить и у вочи ему стануть роскажемы; злетили мы теж послови нашому, абы велможность вашу наведил и то именем нашим преложил, абы велможность ваша, ведаючи, же не толко о наше кролевство, ала о все хрестиянство иде, войску запорозскому до того причиною был, абы воли нашои поволным и послушным ставилосе; в которои справе ширей з велебностю вашею послови нашому, урожоному Бартломею Обалковскому, мовити злетилисмы; которому велебность ваша веру зуполную даси и в том во всем до воли нашей, яко назычливей, склонишь; притом велебности вашей здоровья и всякое помыслности зычимо. Дан з Варшавы, дня 10 месеца листопада, року 1620, панованя нашого полского 23, шведского 26 року. Sigismundus rex.
Кгды вже с Киева тот же Феофан, патриарх Ерусалимский, рушил, уже праве под самый час с панства короля его милости выезду своего, през тогож его милости пана Обалковского лист свой до войска Запорозского, водлуг воли и листу его кролевское милости, греческим языком натерминованый, а на русский язык преложоный и посланный, написал такий: «Феофан, з милосердя Божого патриарха Иерусалимский, Божего места Сиону, Сириеи, Аравиеи, Кана Галилеи, з оное стороны Иордана и всее Палестины. Гетманови, полковником, сотником, асавулом, атаманом и всему зацному и презнаменитому войску Запорозскому ласка от Бога вседержителя и от Господа нашого Исуса Христа и благословение живота дающого гроба Божия и светого Иякова апостола, брата по плоти Господня, хрестиянского першого архиерея, и нашего смирения нехай будет на веки аминь.
Презацный и преславный пане гетмане и преложоные войсковые все прехраброе рыцерство, сынове в духу покорности нашей умилованые! (не разобрано одно слово) добре и росказане пренаяснейшого короля, пана вашого, до нас не доходило, теды вы сами, погледаючи частю на повинность вашу рыцерскую; частю на кгвалтовную потребность отчизны вашое, то штобы з вас ремесло ваше рицерское, которымсе одным з давних веков вы и продкове ваши бавилисте, вытегало, теды под неприятеля Божого и хрестиянского, на панства пренаяснейшого короля, пана вашого, кривавый наступ чинилибысте охотне, пренаяснейший кроль, пан ваш розсказуе вам, яко завжды верным и послушным подданным своим, бо кгвалт отчизне вашей от головного хрестиянского неприятеля, которого ярма неволи турецкое есть великое; теды король его милость по вас того потребуе, абы се готовими зо всею охотою и зо всею силою вашою на тую послугу, на которую вас през посла своего, его милость пана Бартломея Обалковского, который и нам от пренаяснейшого короля лист отдал, затегает, росказует ставили, през што у пренаяснейшого короля, пана вашого, на ласку ку собе панскую значне заделаете, и мне за вас и за все войско ваше богомолцу уставичного знать будете, и отчизне в час потребы на помочи станете, и славу войска вашого значну отнесете и за тую, поднесеную през нас у светои церкви вашои рускои, херархие, митрополита знову и епископов, на местце от светое апостолское Костентинопольское, албо Цари-городское столицы отпалых, на тое местце благочестивых и от нас посвещеных консенсем своим королевским и привилями змоцнит и обварует; о што пилно а пилно наяснейшого короля, пана вашого, пилными прозбами вашими старатсе маете. А мы, як за тое презацное кролевство, так за наяснейшого короля Полского и за все кролевство его, сенат и за вас, славное войско Запорозское, Господа Бога тут и на всявом местцу владычества его и у гробу Божого, если нас до столицы нашей Господь Бог здорового донесет, просить не перестанемы. За тым и повторе ласка и покой Божий и благословенство смирения нашого нехай зостане з милостию вашею – Аминь.
Дан з монастыра Терехтимирова, року от сотворения света 7129, а от воплощения Сына Божия 1621, месеца стычня 7 дня, индикта 4».
Таким листом своим до войска Запорозского светый отец патриарха Ерусалимский на писане короля его милости ставил; тым засе полковником, сотником, которые завсегда при нем были, тоеж а не иначей частокрот отцовско персвадовал, албо мовил. А особливе однак пану Петрови Кунашевичови Сагайдачному, который его за универсалом короля его милости позволенем, а за войсковым росказанем з выборным люду рыцерского полком аж до Волоское границы провадил и нашим сотником и молодцом под тот час, кгды уже з ними на границы разежчал, до цалованя руки его прибылым, перед собою мел, широкими словы через тлумача мовил, абы се ярма поганского, которого указовал быть хрестияном тяжко и неизносно, пилно стерегли, абы милую отчизну свою, а в ней и самих себе, чуле боронили, упоминал и просил.
В року 1620 дня 29 паздерня тресение земли было на чверть годины зекгаровой, пред вечером годин две.
В томже року 1620, дня 9 грудня по заходе слонца страшное затмение месяца было, которое было годин две.
В том же року 1620 дня 4 паздерня короля его милость теперешнего, Жикгимонта третего у Варшаве, кгды входил до костела, неякий Пекарский шляхтич з за дверей костельных короля его милость чеканом обухом в голову вдарил; розрух барзо великий был в месте; удавано, же татарин короля его милость забил. Потом за тот злый учинок оного Пекарского срокгою мукою страчено.
В том же року и месецу сейм у Варшаве зложено, на котором уфалено войну напротив султана Османа, цесаря Турецкого посполитым рушенем и побором.
В том же року 1621 в рицерских справах досветченый его милость князь Семен Михайлович Лыко на подстаростве Черкаском, который не был преконаный боем, але през чаровницу там же в Черкасех с тым се светом пожегнал, где забавы и некоторые справы рицерские виршами коротко выписую, чого сам, при боку его будучи, почасти естем сведом:
Бо то есть дорогий обычай рицера жаловать
И смерть его своею смертию откуповать;
Так чинили оные валечници,
Купуючи Гектора зацного Троянчици:
Золото взаем ваги поступили
Тело оное мужне великим коштом чтили;
В кождом то давном рицерском народе
Мужа до бою золотой даровали свободе
И его рицерские поступки оферовали,
Богу несмертелному за него дяковали.
Такого вожа зыскало российское племе –
Дорогой карбункул неошацованое цене,
Зацна кров мужного князя Лыка кости
Рыцер неошацованый жалости
Князь Семен Лыко, вож делный,
Цнот, уместности и скромности полный.
Кгды за его приводом замок Московский Велгород добывали,
Кгды през штурм и бой добыл места и замку, где войско здобывало.
Скарбу немало; потом збурил Рылск, Путивль
С подивенем всих, яко оный князь был таким рыцерем,
Кгды се теж на Муравских шляхах с татарами потыкал:
Так, яко се биют воды о скалы
Так се князя Лыки войско с татарским зошло,
Не великостю але моцю его прошло;
А сам межный князь почал своим продковати,
Побивши татар, почал щасливе триумфовати:
Зачим от Москвы и от Татар упокоил Украину; тым
Зророве людей и мест Украинных обваровал своим.
Такую моц тот зацный муж в словех у силе
Мев вдячный рицерству и отчизне миле;
Кгды се с послугою своею где поспешил,
Великою учинивши корысть всих тешил,
Або военым способом век свой увесь травил,
В полях диких коло шляхов Муравских татар длавил.
Часом от зною, то от горачности
Опроч хлеба потрав и безводной млости
Тым способом веку он молодого зажил
И рицерской дельности так набыл
Сам теж щасливе с Олександрове премешкивал,
Потех своих з великою радостю заживал .