Уставная Белозерская грамота
УСТАВНАЯ БЕЛОЗЕРСКАЯ ГРАМОТА 1488 Г. МАРТ.
Се яз князь Иван Васильевичь всея Руси пожаловал есми своих людей белозерцов, горожан и становых людей и волостных всех белозерцов: кто наших наместников у них ни будет, и они ходят по сей по нашей грамоте.
1. Взоежжого корму горожане и становые люди наместником нашим на взоезд что кто принесет, то им взяти .
2. На Рождество Христово наместником нашим дадут корм со всех сох, со княжих, и с боярьских, и с монастырьских, и с черных, и с грамотников и со всех без менки, с сохи за полоть мяса два алтына, за десятеро хлебов десять денег, за бочку овса десять денег, за воз сена два алтына; а на Петров день дадут корм наместником нашим со всех же сох, с сохи за боран восмь денег, за десятеро хлебов десять денег. А тиуом корм рожественской и петровской вполы наместнича корму. А доводчиком побор со всех же сох, с сохи на Рожество Христово за ковригу денга, за часть мяса денга, за зобню овса две денги; а на Петров день доводчиком побор со всех же сох, за ковригу денга, за сыр денга .
3. А наместником нашим у них держати в городе и во станех два тиуна да десять доводчиков: во станех восмь доводчиков, а два в городе; а станы и деревни своим доводчиком поделять .
4. А доводчику ездити во стану без паробка и без простые лошади , своего деля прибытка; а побора им в стану и не брати, имать им свой побор у соцкого в городе; а доводчику из своего розделу в другой роздел не ездити; а где доводчик ночует, туто ему не обедати, а где обедает, туто ему не ночевати .
5. А наместники тиунов и доводчиков до году не переменяют .
6. А кормы наместничьи и тиуновы и доводчиковы поборы берут в станех соцкие да платят наместником и тиуном и доводчиком в городе: о Рожестве Христове рожественской корм платят и наместником и тиуном и доводчиковы поборы, а о Петрове дни петровьской корм платять в городе и наместником и тиуном и доводчиковы поборы.
7. А пошлин наместником на Белеозере в городе: явка с гостей, кои гости приходят из Московские земли, из Тверские, из Новогородские земли , или откуда кто ни приедет, с болшаго судна, с ватамана гривна, а людей на судне сколько ни будет, ино с головы по денге; а кто приедет в малых судех в гребных на Белоозеро из Московские земли, или из Новогородские, ино с ватамана и с людей, колко их на судне ни будет, ино с головы по денге. А на Волочке на Словенском наместником держать своих пошлинников, а явку емлют с гостей по тому же: кто придет из Московские земли, из Тверские, из Новогородские земли, и с Устюга, и с Вологды, ино с болшого судна с ватамана гривна, а с людей сколко их на судне ни будет, ино с головы по денге; а в малом судне в гребном кто приедет, ино с ватамана и с людей, колко их ни будет на судне, ино с головы по денге. А который гость заплатит пошлину на Волочке, а на том другие пошлины на Белеозере не емлют.
8. А кто придет из Московские земли, из Тверские, из Новогородские земли, изо всех монастырей Московские земли, и Тверские и Новогородские земли, и с белозерьскых монастырей, из Кирилова, из Фарафонтиева, изо всех белозерьскых монастырей, торговати им всем на Белеозере в городе житом и всяким товаром: а за озеро им всем торговати не ездити. А по волостем и по монастырем не торговати житом и всяким товаром, опрочь одное волости Углы; а на Угле быти торгу по старине. А кого изымают, кто поедет за озеро, или кто учнет торговати по волостем и по монастырем белозерьским, и они с купца возмут два рубля, рубль наместником, а рубль таможником; а с продавца возмут два же рубля, рубль наместником, а рубль таможником; а что у них будет товару, у купца и у продавца, и тот товар у них емлют таможники на великого князя, а их дают на поруце наместники и таможники да ставят перед великим князем. А городьским людем белозерьским посажаном за озеро ездити и торгавати по стране.
9. А будет суд перед наместники и перед тиуны о рубле, а восходят ся помирити, и они дадут наместником гривну, и с тиуны и с доводчики, за все пошлины; а досудят наместники и тиуны о рубле до поля, а восхотят ся помирити, и они дадут наместником гривну, и с тиуны и с доводчики, за все пошлины; а будет выше рубля или ниже, и наместники на них емлют по тому же росчоту; а побиются на поле, и наместники велят взяти на виноватом истцово доправити, а на себя велят взяти противень против исцова, а то им с тиуны и с доводчики за все их пошлины .
10. А доведут на кого татьбу, или розбой, или душегубьство, и наместники велят на виноватом истцово доправити, а тот розбойник или душегубець наместником в продаже и в казне .
11. А поличное то, что выимут из клети изъза замка; а наидут что в дворе, или в пустой хоромине, а не за замком, ино то не поличное .
12. А у кого что признают татебное, и тот с себя сведет свод, хотя и до десятого своду и до чеклого татя, а наместники у них в том не возмут на них ничего .
13. А самосуда наши наместники и их тиуни емлют два рубля: а самосуд то, кто поимает татя с поличным да отпустит его прочь, а наместником и их тиуном не явя, а его в том уличат, ино то самосуд; а опричь того самосуда нет .
14. А учинится у них в городе душегубьство, а не доищутся душегубьца, ино вины четыре рубли заплатят горожаня; а учинится душегубьство в коем стану или в коей волости, а не доищутся душегубца и они вины четыре рубли заплатят в стану или в волости, в коей душегубьство учинилося; а доищутся душегубца и они его дадут наместником или их тиуном, а хрестьяном в том продажи нет. А кого у них в лесе дерево заразит, или с дерева убиется, или зверь съест, или кто в воду утонет, или кого возом сътреть, или кто от своих рук потеряется , а обыщут без хитрости, ино в том вины и продажи нет.
15. А станов к городу: Городецкий стан, да Напорожский стан, да Заозерский стан.
16. А езд в станы и в волости на две версты денга, а в городе хоженого денга, а на правду вдвое. А от поруки пристав у них не емлет ничего.
17. А кто дасть дочерь замужь, из города в волость, или из волости в город, или из волости в волость, и он даст за выводную куницю алтын; а кто дасть дочерь за мужь за рубежь , в Московьскую землю или в Ноугородскую, и он дасть за выводную землю или в Ноугородскую, и он дасть за выводную куницю два алтына; а в городе и во стану и в волости в одной, ино свадебного за убрус две денги, а десятиннику владычню знамени три денги .
18. А кто у кого межу переорет или перекосит, и наместники наши и их тиуни возмут на виноватом за боран восмь денег .
19. А наместником нашим и их тиуном без соцков и без добрых людей не судити суд.
20. А тиуном и наместничьим людем на пир и на братчину незваным не ходити ; а кто приедет к ним на пир и на братчину незван, и они того вышлют вон безпенно; а кто у них имет пити силно, а учинится какова гибель, и кому то платити без суда, а от меня от великого князя быти в казне .
21. А князи мои, и бояре, и дети боярьские, и всякие ездоки, у горожан и у становых людей и у волостных людей кормов и подвод, и проводников, и сторожов не емлют ; тако же и гонци мои великого князя без грамоты подвод и проводников у них не емлют.
22. А пиедет мой пристав великого князя, с Москвы, по белоозерца по горожанина и по станового человека и по волостного, и он им пишет один срок в году, на заговение на великое на мясное: а опрочь того сроку кто на них иной срок накинет, а не по их сроку, или кто на них зазывную грамоту принесет, а не по их сроку, и яз князь велики им к тем сроком ездити не велел; а хотя кто на них безсудную грамоту возмет, а не по их сроку, и та грамота безсудная не в безсудную; а пристав емлет у них… скоро езду три рубли, а от поруки у них не емлет ничего.
23. А кому будет белозерцом, горожаном и становым людем и волостным обида от наместников и от волостей, и от тиунов обида и от доводчиков, и они сами сроки наметывают на наместников и волостей и на их людей. А через сю мою грамоту кто что на них возмет, или чим изобидит, быти тому от меня от великого князя в казне . А дана грамота лета девятьдесят шестаго, марта.