Жалованная грамота короля Казимира
ЖАЛОВАННАЯ ГРАМОТА КОРОЛЯ КАЗИМИРА ЛИТОВСКОМУ, РУССКОМУ И ЖМУДЬСКОМУ ДУХОВЕНСТВУ, ДВОРЯНСТВУ, РЫЦАРЯМ, ШЛЯХТЕ, БОЯРАМ И МЕСТИЧАМ, 1457 МАЯ 2.
Во имя Божье, аминь. К вечной речи памяти. Вси речи, которыи ж бывают, от людскои памяти поспол с часом отходят , а ни потом к памяти могут приведены быти. Про тож мы Казимир, с Божьей милости выбранный король Польскый и великий князь Литовскый, и Рускый, и Жемоитскый и иных земель, познавшее верность уставичную почтивых, достойных, освеченых, выбраных, мудрых прелатов духовных и светьскых княжат, рыцеров, шляхтичов, бояр, местичов земель великого княжьства Литовского и Руского, Жемоитского, которую ж к нам и к нашой парсуне освяченой, как ж то до правого дедича и пана прироженого, имели и имають, а такожь и напотом имети уставичне и вернее мыслять, якожь то черес осмотрение наше есть найдено: достойнее умыслили есмы, за такыи доброты и ласкы, дары и иными ласками им милостивее отдарить; бо тогды потом к нам и к нашим службам найдени будуть рыхлейши, коли себе узрять такыми ласками утешоны .
1. Тогож деля, наипервей, предреченым прелатом, княжатом, рытерем, шляхтичом, бояром, местичом нареченных земель великого княжества Литовского и Руского, Жемоитского, неотзывне дали есмо и моцью того-то листа щедрее даваем, проиволяем и вечне даруем посполито, овшейкы права тые, зволеньства, твердости, якож имают прелати, княжата, рытери, шляхтичи, бояре, местичи коруны Полское; алебы потом в том не было ни которое отщепение, а любо недоверьство возникнуть, туто умыслили есмы положити черес выклад письма явнее.
2. А на-первей, вся дарованая, привилиа, твердости церквей головных, зборных и кляштырных, в землях наших великого князьства Литовского и Руского, Жемоитского и иных, поставленых и заложеных, а и потом которыи будут заложены, хочом без порушениа и без обид ховати, боронити и щитити, в подлуг всее нашее моци. Которая ж то церква головная, зборная, кляштырная, по смерти… иж бы пуста была, а пастыря не дръжала, которое жь поданье к нам и к нашим наместником пригодило бы ся; тогды им с полного права, не иного, а любо не иных, пастыря, а любо пастырев давати имаем, нижь ли великого князьства нашого Литовского, прироженого, аж достойными обычаи найден будеть: аж пак не будеть, тогды иншого рожаю парсуну ужиточную, почестливую, згодную, которая жь бы могла рядить и вжиточна быти, имаемь дати, только крат, колько будеть надобе .
3) Также предреченым прелатом, княжатом, рытерем, шляхтичом, бояром, местичом предреченных земль великого князьства Литовского, Руского, Жемоитского, дали есмо: што ж ни на жадного обмовление явное, или тайное, тых княжат, рытерев, шляхтичов, бояр, местичов не будем казнити ни именьи, а ни пенязьми, ни нятством, ни кровью , оли жь очи-в-очи, оба посполь, явно стануть на суде, в подлуг права христианьскаго; который ж будеть у подлуг переможениа права виноват, в подлуг обычаа и права коруны польское имають бытии казнены и сужены, подлуг их великости проступков .
4. Тако ж за проступку, каковоль коли проступить, ни хто иный, только тот виноватець, хто проступить подлуг права христианьского, имать бытии казнен; штож ни жена за проступку мужа своего, а ни отец за проступку сына, а ни иный прироженый, а ни слуга только олиж бы был причастник тое проступкы, только выймуючи проступкы против нашего господарьства .
5. Також призволяем, а бы княжата, рытери, шляхтичи, бояре доброволно имели бы моць выехати з наших земль князьства великого, для лепшого исицастиа набытья, а любо учинков рытерьских , до каждых земль, сторон, толко выменяючи стороны неприательское; а куды выеждиваючи из своих именей, што-бы службы наши не были замешканы, але нам и наместником нашим как бы сами очивисте были, только крот, колько надобе, служили бы.
6. Також предреченыи княжата и рытеры, шляхтичи, бояре, местичи, имениа своя и отчины, што им данье, а любо дарованное чересь освяченого князя Олександра нареченого Витовта, достойной памяти дяди нашего, и черес освяченого князя Жикгимонта данные и дарованные, которыи ж держали, и имаюче и володеюче из их дарованиа, привильями, достаточным светочьством, твердостию листов возмогут досветчити, — с правом имают держати, якож то княжата и рытери, шляхтичи, бояре, и местичи у короне полской своя имениа держать, и добровольную моць имают продати и заменити, и зычити, и дарити, к своему лепшому обернути; а коли тыи имениа продаючи, заменяючи, изыначаюче , даруюче, перед нами а любо перед нашими наместникы имают здати .
7. Також по смерти отцове, сынове и дочкы от свое отчины не имают отдалены быти, але с их ближними с полным правом имають володети, яко ж то княжата, рытери, шляхтичи и местичи коруны полскые своим володеють и к ужитком добрым промышляють .
8. А також, коли некоторому князю, рытеру, шляхтичю и местичу с того света пригодилося бы изыйти, тогды удову у-в именьи мужа ея оставити хочом, так долго, как долго будеть на столци вдовьем седети : ажь, пак, коли которая усхочеть к другой свадбе приити, маеть быти дана, кого жь выбереть. А дети ажь будуть первого мужа, в именьи имають остати: ажь, пак, не будеть детей первого мужа, ино ближним именье первого мужа, яко ж и иныи удовы у коруне полской держать.
9. Ажь первый мужь у предреченом именьи своем своей жене некоторое вено запишеть, а она можеть того досветчити: тогды, подлуг обычаа права, кому усхочеть, тому полецить.
10. А такожь дочкы, племенници и удовы могуть за мужь давати, нас и наших наместников не докладываючи, нижли толко обычаи христианскыи у том заховаюче .
11. А теж вси, а кажды особне, селяне и подданные княжатом, рытерем, шляхтичом, бояром и местичом наших земль великого князьства Литовского, от всего даниа и заплаты, собранья, вытягнениа серебщизны, и теж мер, которыи же дякла реченыи суть, от вожениа плит, а любо мелу на городы, сенокошениа и иных несправедливых робот выпущены и будуть вольни овшейкы и выняты, выменуючи роботы на будованье городов наших новых потребных, а старых поправлениа; теж княжатом, рытерем, шляхтичом селян данных и подданных и черес нас им дарованных а також выимаюче .
А теж из стародавна зыченые на нас и на наши будущии уряды, поборы, стацыи, мостов новых чинениа, старых поправлениа, а городов оправлениа, непорушне заховаем, а и хочем всегды имети не слободных.
12. А такожь мы, а любо заказникы наши, тых предречоных княжат, рытерев, шляхтичов, боярь, местичов земль наших Литовскых и Рускых и Жемоитскых и иных людей данных, извечных, селянятых, неволных, которое бы коли плоти были, а любо достойности, не пиймем, а ни урядником нашим приняти не перепустим ; а они тежь прелати, княжата, рытери, шляхтичи, бояре, местичи великого Литовского и Руского, Жемоитского, наших и будущих людей, которые бы коли плоти были, а любо достойности, приняти сами, а любо черес свои врядникы, ни жадным обычаем не смети будуть.
13. А такожь на подавание предреченых княжат, рытерев, шляхтичов, бояр, местичов, децькых не дамы: оли жь бы первей от пана, которому ж тот поддан, который кривду вчинил, правда пожадана была, ачь бы он на рок не хотел к праву поставити; тогды наш децкый, а любо наших заказников имать быти послан; а виноватый, который вину заслужил, пану своему, а не иному, будеть обязан заплатити .
14. А такожь, обецюем и слюбуем, ижь панства нашего земль, великого князьства предреченого, не вменшим, але у границах, как же предъкы были наши, на имя князь Александр, нареченый Витовт, дядя наш, и иные дръжали и володели, такожь и мы тые ж земли, здорови, целы, держати будем и володети и щитити, а с Божьею помочью и всими силами нашими розмножати будем.
15. Такожь обецюем и слюбуем, иж в землях тых наших великого князьства, земль, городов, мест, а любо которых-колвек детичьтв, у володение и в дерьжание, а любо некоторыи вряды, а любо чьти не имаем дать в честь никоего чюжеземца, але только там родичам тых земль наших предреченых великого князьств Литовского дамы, и наши после будущии дадут в дерьжание и володенье .
А на сведетьство сего листа, печять нашя есть привешена. А деялося и дано черес руце велемощного Михаила Кезкгайловича Здявилтовича, великого князьства Литовского канцлера, в Вилни, в день святаго Жикгимонта, в лето Божиа нарожениа тысячя четыриста 57-е. Писан руками Мартиновыма з Лужка, он жо то имел с приказу.
