Запись о смоленской посощине

ЗАПИСЬ О СМОЛЕНСКОЙ ПОСОЩИНЕ, 1453 (ИЛИ ПОЗЖЕ), МАРТА 21.
О посощину смоленскую. То старина за Витовта была, поведают стары старцы и путники старыи: з отчин боярьских не давана посощина, и тож с купли, хто што купит отчину боярьскую, и с того тож не давана посощина ; а што приданье великого князя Витовта, или иных великых князей, и с того давана посощина. А також, кому дасть великый князь пустовщину, селище посощинное, а служба будеть одна была с того селища, и сядет сам боярин на том селищи, и людей што за собою посадит на том селищи: с того господарю конем служит и на приезд конь дает, а посощины и с тых людей не дает. А приймет ли другое селище, с которого посощина хоживала, а посадит человека: с того дает посощину; а што будет лес тогож селища николи не пахыван, и тот лес роспашет и посадит людей: и с тых людей нет посощины . Також, которому коли боярину дал будет селища посощныи великый князь Витовт, или иныи великыи князи, и тот боярин посадить слугы своя на тых селищах, которым же слугам отпустил будет великий князь не давать посощины, а будуть на то листы имети, а любо добрый довод: тыи не мають давати посощину .
Також о боброваи гоны поведали тыи ж старцы : где берег великого князя сумежный з боярьскыми, туто гонити бобры бобровником и великого князя и боярьскым, и поделити бобры по старому; а сетей, и рожнов, и осок, и собак бояром не держать, и поколодв и кошов не ставити. А где князскыи или боярскыи берегы их особныи, а великого князя берег не пришол будет к которым берегом: туто им ставити поколодвы и коши, и собакы держать и сети; как мога, так им бобра ловити. Писан в Вилни, марта 21, индикта 1.

Did you enjoy this post? Why not leave a comment below and continue the conversation, or subscribe to my feed and get articles like this delivered automatically to your feed reader.

Comments

Еще нет комментариев.

Извините, комментирование на данный момент закрыто.