Закладная на землю

Закладная на землю.
XIII или XIV в.
Се я Обросим и Лаврентий Васильевы дете взяли есмя себе у Федора у Макарова десять сороков бел на десять лет да на три лета, а в тех кунах заложили есмя отцину свою село земли на Лодьми, ораные земли, и пож, и по купной грамоте по Васильеви, отца своего, и путики, и тони, и двор; а изойдет 10 лет да 3 лет, ино Федору свои куны у Обросья и у Лаврентия свои куны взяти, а земли отступится, а грамота отдать купная и закладная; а будет Обросии и Лаврентию не до земли, ино им у Федора на тои земли доняти на тои земли 5 сороков бел да два пуза ржи семянньи, а купная грамота ним Федору на ту землю дат, а в людеи ним кун не имати, а выкупити ним та земля своими кунам. А на ть люди: Иван Соцкой, Борис Левков, Оксентии пасынок, Иван Нетесь…. Васильевич, Орефа Ермолин. В пецат стояли и землю завел сами Обросим и Лаврентий Васильевы дет; а оцищиват та земля Обросиму и Лаврентию, Федору и его детям.
Подлинник писан на пергаменте длиною в 4 ½, шириною в 2 ½ вершка. К нему приложен лоскуток бумаги, на котором тем же почерком приписано: а цто есть на бору колодязь солонои, ат а колодязь Федору и Лаврентию и Обросиму истьцистити да и церен наставит да пытати варить но досугу, а будет в росоли прок, а имет быти, даст Бог, сол, ино Федору у Обросииа и у Лаврентия и до сроку своих кун взяти половина, 5 сороков бел, а земли половины ступится цист без брани, а половиною земли по запис владет Федору другою до срока 10 лет. А на т послухи тижо, кои в закладной имены лежать грамоти. А пытати цистит и варит ним по досугу в те лет в десят лет, как могя.
Закладная напечатана в «Актах, относящихся до юрид. быта», т. II, № 126, I.