Присоединение Новгорода Великого

ПРИСОЕДИНЕНИЕ НОВГОРОДА ВЕЛИКОГО
Из Никоновской летописи.
В лето 6985, месяца марта, архиепископ Новгородской Феофил и весь Великой Новъгород прислали к великому князю Ивану Васильевичю и к сыну его, к великому князю Ивану Ивановичю, послов своих Назара Подвойского да Захарию диака вечнаго бити челом и называти себе их «господари» , а наперед того, как и земля их стала, того не бывати: никотораго великого князя «господарем» не называли, но «господином» . Тое же весны послал князь великий в Новгород послы своя, месяца априля 24, в четворток, Федора Давидовича, Ивана Борисовича, а с ними диака Василия Долматова, ко владыце и ко всему Великому Новугороду покрепити того: какова хотят государства их отчина их Великий Новъгород? И они того запер лися, ркущи: «С тем есмя не посылывали», и назвали то лжею.<.. .> И того же месяца , и еще послом великого князя в Новегороде, и бысть мятежь в Новегороде: сотвориша вече, и пришед, взяша Василия Микифорова и приведоша его на вече и въскричаша: «Переветнике , был ты у великаго князя, а целовал еси ему крест на нас». Он же рече им: «Целовал есми крест великому князю в том, что мы служыти ему правдою и добра ми хотети ему, а не осподаря своего Великого Новагорода, ни на вас, на свою господу и братию». Они же без милости убиша его, а по обговору Захарии Овина, а потом и того Овина убиша, и з братом Кузьмою у владыки на дворе; а от того часа возбеснеша, яко пьании, ин иная глаголаше, и к королю паки восхотеша.<…>
В лето 6986. Месяца сентября 30, посылает князь великий к Новугороду складную с Родионом именем Богомоловым, с подначим. Месяца октября 9 день, в четворток, на память святаго апостола Якова Алфеева, выиде князь великий с Москвы к Новугороду за их преступление казнити их войною. <.. .> Месяца октября в 19, в неделю, въехал князь великий в Торжек; и туто же в Торжек приехали к великому князю бояре новогородские Лука Климентьев да брат его Иван и били челом великому князю в службу. <…> Октября же 23 выехал великий князь ис Торжьку, а пошел ратию на Новъгород; а шел от Торжьку на Волочек, а оттоде шел меж Яжелобицкие дороги и Меты. А царевичю Даньяру велел ити от Торжьку по за Мете, а с ним воевода великого князя Василеи Образець Борисовичь. И по своей стороне Меты велел ити князю Данилу Холмскому, а с ним дети боярские великого князя, двора его, многие да Володимерци, Переславци и Костромичи все; да тою же дорогою велел ити бояром своим и Тферичем, Григорию да Ивану Микитичем, з Дмитровци и с Кашинцы, которые служат великому князю Семену Ивановичу Ряполовскому, а с ним Суздалци и Юрьевци. А по левой руце от себя, ис Торжку на Демон, велел ити брату своему князю Андрею меншему, а с ним воевода великого князя Василеи Сабуров с Ростовци и Ярославци и Углечаны и Бежичаны, которые служат великому князю; да и матери своей воеводе Семену Федоровичю Пешку з двором ея с ними же велел ити. А межи Демноские дороги и Яжелбецкие велел ити князю Александру Васильевичю да князю Борису Михайловичю Оболенским; а со князем Александром Колужане, Олексинци, Серпоховичи, Хотунци, Москвичи, Радонежци, Новоторжци, Берновы и Глуховы; а со князем Борисом Можаичи, Волочане и Звенигородци и Ружане, которые служат великому князю. А по Яжелобицкой дорозе велел ити Федору Давидовичю, а с ним дети боярские из двора великого князя, да и Коломничи все; да по той дорозе велел ити князю Ивану Васильевичу Оболенскому, а с ним братиа его, все Оболенские князи, да и многие великого князя двора дети боярские. А опасщиков Новогородских обеих, Федора Калитина да Ивана Маркова, велел князь великий ис Торжьку вести за собою.
Октября же 26 на Волочке встретил великого князя посадник Новогородской Григорий Михаиловичь Тучин и бил челом в службу. Октября же 28 на Березке приехал к великому князю Новогородец жытей Андреян Савельев служити.<.. .>
Ноября же в 4 на стану в Болбловых пришел к великому князю от великого князя Михаила Тферскаго воевода его князь Михайло Федорович Микулинской с полки Тферскими в помощь великому князю на Новогородцев же; и князь великий почтив его да велел ему за собою же пойти по своей дорозе. Ноября же в 8 в Яглине у Спаса князь великий велел быти у себя опасщиком Новогородским Федору Калитину да Ивану Маркову; и пришед пред него, начаша бити ему челом от владыки Новогородского Феофила и от Великаго Новагорода о опасе, и назвали великого князя государем: «Чтобы еси, государь, пожаловал, опас дал владыце и посадником Новогородским приехати к себе бити челом и отъехати доброволно». И князь великий пожаловал, опас дал и опасную свою грамоту . Ноября же 10 в Ываничех въстретил великого князя третий опасщик Григорей Михайлов Совкин, а в 11 у Николы в Локотсте велел ему князь великий прийти к себе. И он бил челом от владыки и от Новагорода, государем же зовучи великого князя, а прося опаса; и князь великий велел отвечати диаку своему Василию Далматову, тако рече великого князя словом: «Что еси нам бил челом от нашего богомолца и от нашие отчины, и яз пожаловал, опас дал первым опасщиком Ивану Маркову да Федору Калитину, и владыка и послы Новогородские по той опасной приедут и отъедут от нас добровольно».<…>
Ноября же 27, в четверток, пришел князь великий под город, а чрез Ильмерьозеро по леду… Декабря же в 7 прииде к великому князю владыка из Новагорода с … посадники и жытиими, да с ними пять человек черных от пяти концев: от Неревского конца Аврам Ладожанин, а от Горньчавского Кривой, а от Словенского Захар Брех, а от Загородского Харитон, а от Плотничскаго Федор Лытка. Бил челом владыка и жытии и чернии о том же, как и прежде, чтобы государь смиловался да пожаловал бы государь, ос л обод и л з бояры своими поговорити; и князь великий велел бояром своим князю Ивану Юрьевичю и Федору Давидовичю да князю Ивану Стризе, да з бояры Василию да Ивану Борисовичем. А владыка со всеми своими посадники и жытиими и черными били челом: первая речь Якова Коробова с челобитьем, чтобы государь князь великий пожаловал, велел своему наместнику судити с посадником; а Фефилат посадник бил челом, чтобы государь князь великий пожаловал и на всякий год имал со всех волостей Новогородских дань с сохи по полугривне Новогородской; а Лука посадник бил челом, чтобы государь пожаловал, пригороды Новогородские держал своими наместники, а суд бы по старине был ; а Яков Федоров посадник бил челом, чтобы пожаловал князь великий, вывода не учинил из Новогородские земли, да и о вотчинах боярских и о землях, чтобы государь не въступалея, да послов бы жаловал. Московские в Новъгород не были; да все били челом о том, «чтобы в Низовъскую землю к берегу службы нам, Новогородцем, не было, а которые рубежи сошлися здесе с Новогородскими землями, и по своих государей повелению мы, отчина их, ради того боронити» .
И бояре, шед, князю великому те речи сказали; и князь великий выслал к ним тех же своих бояр со ответом, а велел им сице отвечевати: «Били есте челом мне, великому князю, ты, наш богомолец, и наша отчина Великий Новъгород, зовучи нас себе государи, да чтобы есми пожаловали, указали своей отчине, какову нашему государьству быти в нашей отчине в Великом Новегороде; и яз князь великий то вам сказал, что хотим господарьства на своей отчине Великом Новегороде такова, как наше государьство в Низовской земле на Москве; и вы нынечя сами указываете мне, а чините урок нашему государьству быти: ино то которое мое государьство?» И владыка и посадники и жытии били челом, а молвят бояром так: «Мы своим государем великим князем урока не чиним их государьству; но пожаловали бы наши государи свою отчину великие князи, явили своей отчине Великому Новугороду, как их государьству быти в их отчине, занеже, господине, отчина их Великий Новъгород Низовъские пошлины не знают, как государи наши великие князи господарьство свое держат в Низовъской земле».
И бояре шед сказали то великому князю; и князь великий их же послал со ответом, а велел так говорити: Князь Иван Юрьевичь нача говорити. «Князь великий тебе, своему богомольцу владыце, и вам посадником и жытиим и черным людем тако глаголет: что есте бити челом мне, великому князю, чтобы яз явил вам, как нашему государьству быти в нашей отчине, ино наше государьство великих князей таково: вечю колоколу во отчине нашей в Новегороде не быти, а господарьство свое нам держати; ино на чем великим князем быти в своей отчине, волостем быти; селом быти, как у нас в Низовской земле; а которые земли наши великих князей за вами, а то бы было наше; а что есте били челом мне, великому князю, чтобы вывода из Новогородской земли не было, да у бояр у Новогородских в вотчины в их земли нам, великим князем, не въступатися, и мы тем свою отчину жалуем: вывода бы не пас лися, а в вотчины их не въступаемъся; а суду быти в нашей отчине в Новегороде по старине, как в земле суд стоит».
Того же дни, в неделю, приидоша к великому князю под город Псковичи, наместник великого князя Псковской Василий Васильевичь Шуйской, а с ним посадници Псковичи со многие вой: посадник Алексей Васильевичь Кочанов, да Зиновей Сидоров, да Стефан Максимов и иные посадники и бояря и дети боярские и многие Псковичи. В 14 день, в неделю, владыка пришел к великому князю с посадники и с прежеписанными, и начяша бити челом, чтобы государь смиловался над своею отчиною да з бояры бы велел говорити: и князь великий бояр с ними говорити выслал. И они учали бити челом, а вече и колокол и посадника отложыли, чтобы государь с сердца сложыл и нелюбьа отдал, и вывода бы не учинил, и в вотчины бы их, в земли и воды, не въступился и в жывоты их, да пожаловал бы и позвы Московские отложыл в Новъгород, да службы бы пожаловал в Низовскую землю не наряжал. И князь великий тем всем пожаловал их. И они начаша бити челом, чтобы государь дал крепость своей отчине Великому Новугороду, крест бы поцеловал; и князь великий отрече то: «Не быти соему целованию». И они били челом, чтобы бояре целовали к ним; и князь великий и то им отмолвил; и они еще о том челом били, чтобы наместнику своему велел целовати, которому у них быти: он же и того не учинил. И они еще били челом о опасной грамоте, и князь великий и того не дал им .
<…> Генваря 20 князь великий из Новагорода послал на Москву к матери и митрополиту, да к сыну своему к великому князю, князя Ивана Ивановича Слыха с тем, что отчину свою Великий Новъгород привел во всю свою волю и учинился на нем государем, как и на Москве; а приехал на Москву с тем того же месяца в 27.
Из «Истории Российской» В.Н. Татищева о причинах похода на Новгород.
<…> Князь великий Иоанн Васильевич уведав тайне, яко новогородцы, забывше свое крестное целование, мнози начаша тайне колебатися и королем ляцким и князьям литовским ссылатися, зовуще его с воинствы в землю Новогородскую. И король обесчевал итти к Новугороду, а к хану Большой Орды посла звати на великаго князя, и к папе посла просить денег на подмогу. И папа деньги повеле ему взяти в Лятской и Литовской земле от церквей, дабе ему теми деньгами, победя великаго князя, привести Русь в их поганую латинскую веру. Они же слаша к немцам, но тии отрекошася, зане не смеяху пскович; а псковичи о том и не ведали. Князь же великий, не хотя воев много томити, поиде миром октября 26. <…>